Shillong, Lber 30
Ki nonghikai kiba don hapoh ka shatri jong ka Meghalaya Schools Welfare Development Association (MSWDA), ha ka 29 tarik u Lber 2025 ki la pynlong ïa ka jingïakynduh lang jong ki nongkitkam bad nongpynïaid jong ki skul na ki distrik bapher-bapher ka Jylla ban ïa shong pyrkhat halor kumno ban ai jingmut sha ka Sorkar ha kaba ïadei bad katto-katne ki bynta kaba kum ki skul bad ki nonghikai ki donkam.
Haba ai jingkren sha ki lad pathai khubor, na ka liang u Bah HM Marbaniang kum President, u la ong ba kane ka jingïalang ka kynhun ka long ban leit ai jingmut sha ka Sorkar ban pynbeit ryntih noh ïa baroh ki skul naduh ki Pre-Primary haduh ki Secondary bad Higher Secondary School.
U Bah Marbaniang u la ong ba ka Association kan ai jingmut ruh ïa ka Sorkar ba ïa ki skul ki bym dei jong ka Sorkar bad kiba dei ki skul shimet, ka Sorkar ka la dei ban ithuh noh ïa ki kum ki ‘Non- Government Institution’.
Shuh-shuh, kane ka kynhun lyngba u Bah Marbaniang u la ong ba ka Sorkar ka dei ban ïarap ïa ka jingsiew sha ki nonghikai da kaba ai ïa kajuh ka jingsiew kaba ïaryngkat kumba long lem kiwei ki skul kiba dei ki Non-Government School khnang ba ki nonghikai kin ïaineh haba ki hikai skul da kaba bynrap ruh ba ki kwah ba ka Sorkar kan plie lad ïa ki nonghikai kiba la don ha ka kam ba kin pyndep ïa ka jingpule B.ED.
“Ka long ban ïada na ka jingphet jong ki nonghikai namar kane ka long ka jingeh jong ngi ki skul ba haba ki nonghikai ki ïoh noh ïa ka jingtyrwa sha kiwei ki skul bad ïoh ïa ka jingsiew kaba kham tam, ki la leit noh namar ka jingbym don ka jingïaryngkat”, ong u Bah Marbaniang.
Ha kaba ïadei bad kine ki mat, na ka liang ka kynhun ha ki taïew ban sa wan kan sa leit ban ïakynduh ïa u Myntri ka tnat pule-puthi ka Sorkar Jylla, u Rakkam A Sangma bad ong ba lada ka mih kano-kano ka jingbym sngewhun hadien ka jingïakren, ka kynhun kan sa leit ban ïakynduh noh sa ïa u Myntri Rangbah ka Jylla, u Conrad K Sangma.
