Shillong, Lber 30
Ka jingshah tuh jong ki arshaka, ka jingshah prong tuh jong ki ïing ki dukan, ka la nangjur bad jyllei na kawei ka sngi sha kawei pat, haduh ba ki trai jong ki kali ne ki ïing kim don shuh ka jingshngaiñ ban pynïeng ïa la ki kali ne arshaka ban ieh ïa ki ïing ki sem.
Katkum ka khubor kaba la ïoh na ki pulit la ong ba u Bah Khraw Kupar Shabong u la ai ka jingujor ba ha ka step jong ka 27 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AC-9879 na phyllaw jaka sah ka jong u, kaba don ha Madan Ïing Syiem, Mylliem ha East Khasi Hills.
Ha kawei pat ka khubor, u Bah Baniaijop Kharsati u la ai ka jingujor ba ha ka step jong ka 27 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-T-5328 na Mawlai Mawdatbaki Pata, Shillong.
Ha kawei pat ka jingujor sha ki pulit, ka Kong Balari Sanglyne Basan ka la ujor ba hapdeng jong ka miet ka 26 bad 27 tarik mynta u bnai, ki runar bym lah ban ithuh ki la prong tuh hapoh ka dukan die dawai ka jong ka, kaba don ha Revenue Block, Rynjah, Shillong bad ban rah tuh ïa kawei ka mobile phone, ki dawai kiba shongdor kumba T.25,000/- bad ka pisa kaba long T.61,000/-.
U Paominhao Kipgen u la ujor sha ki pulit ba ha ka por mynsngi jong ka 27 tarik mynta u bnai, ki runar bym lah ban ithuh, ki la prong tuh hapoh ka ïing ka jong u, kaba don ha Lumbasuk Nongthymmai, Shillong bad ban tuh ïa ar tylli ki laptops, kawei ka mobile phone, kawei ka speaker, uwei u air pods bad uwei u power bank.
Kumjuh ruh ka Monica Lalhlimpuii ka la ujor sha ki pulit ba ha ka por 1.30 mynsngi jong ka 24 tarik mynta u bnai, uwei u runar bym lah ban ithuh, u la prong tuh hapoh ka ïing sah ka jong ka, kaba don ha Madanrting Block-C, Shillong bad ha kaba u la tuh ïa uwei u ear pod bad uwei u tyndong lyer shet jingshet. Ïa kane ka kam tuh, la lah ruh ban lap lyngba ki kor CCTV.
