Shillong, Lber 31
U Nongaiktien ka Sorkar MDA-II, Bah Paul Lyngdoh, u la ong ba ka Sorkar Jylla kam pat kynrandien ha kaba ïadei bad ka jingdawa na ka Sorkar India ban pyntreikam ïa ka Inner Line Permit (ILP) hapoh ka Jylla, bad ka long kaba donkam ban pynjur ka leit khroh ïa ka Sorkar India ban lah pynkohnguh ïa ka rai jong ka Sorkar Jylla ban pyntreikam ïa ka ILP.
“Kane kam dei ka kam kaba ka Sorkar Jylla ka lah ban leh. Ka Sorkar Jylla ka lah tang ban pynsngew, hynrei ka rai kaba khatduh ka dei na ka Sorkar India”, u la ong.
“Ngim pat kynrandien ïa kane ka rai (resolution) jong ka ïingdorbar thaw aiñ ka Jylla. Ma ngi ruh ngi la ïadon bynta ha ki snem kiba kham mynshwa ban wanrah ïa kane ka jingdawa. Ngin hap ban pynkhlaiñ ïa kane ka jingleit khroh ka jong ngi khnang ba ngin lah ban pynkohnguh ïa ka Sorkar Kmie ban shim ïa kane ka rai pyntreikam ïa ka ILP”, la ong u Bah Paul Lyngdoh.
Haba pynpaw ba u Myntri Rangbah, Conrad K Sangma u dang bteng ban ïakren bad ka Sorkar India halor kane ka phang, u Bah Paul uba dei ruh u Myntri hapoh ka Sorkar, u la ong ba u Myntri Rangbah u la pyntip ba u la ïakren biang bad u Myntri Kam Pohïing ka Sorkar Pdeng, Amit Shah bad ïathuh ruh ba ki don bun ki jingartatien ba ka Sorkar India ka la pynsngew ha u Myntri Rangbah.
Katkum ka jingong jong u Bah Paul, ka jingartatien jong ka Sorkar India ka long da kaba ai ïa ki daw ba bun, kynthup ba ka Jylla Meghalaya ka don ïa ka Khyrnit ba Hynriew kaba teh kyndon bad ïada kyrpang ïa ka khyndew ka shyiap, ba ka Jylla Meghalaya ka dei ka Jylla kaba hap ïaid lyngba sha kiwei pat ki Jylla ka thaiñ Shatei Lam Mihngi kaba wanrah jingeh kumno yn khang ïa ki briew kiba ïaid lynti sha kiwei ki Jylla.
“Ngim dei ban peit tang ïa ki jingeh, hynrei ban peit ruh ïa kiei kiba lah ban long. Ki nongïalam ki dei ban long kita kiba lah ban weng ïa ka jingeh”, u la ong.
U Bah Paul u la ong shuh shuh ba ka ILP kam dei tang ka jingkwah jong ka Sorkar, hynrei ka dei ka jingkwah jong ki paidbah ka Jylla kaba la pynpaw hapoh ka rai jong ka ïingdorbar thaw aiñ ba la mynjur lang da ki 60 ngut ki MLA kiba mihkhmat ïa ki paidbah.
Lah ban kdew ba ka ïingdorbar thaw aiñ ka Jylla ka la mynjur ban dawa pyntreikam ïa ka Inner Line Permit (ILP) ha u Nohprah 2019, hynrei wat hadien 5 snem ba la mynjur da ka ïingdorbar kane ka ‘resolution’ ka la sahteng noh namar ka jingbym ai rai ka Sorkar India.
