Shillong, Lber 31 (UNI)
Ka thma ktien ka la mih hapdeng u Myntri Rangbah ka Jylla, Conrad K. Sangma bad u Myntri Rangbah barim ka Manipur, Nongthombam Biren Singh hadien ba u la sei ïa ka kyrteng jong u Lamphang barim ka Lok Sabha, u P.A. Sangma (Bam Kwai ha Dwar U Blei) haba phai sha ka jinglong-jingman ka saiñ pyrthei ha Manipur.
U Singh, uba la ieh noh kam kum u Myntri Rangbah ka Manipur ha ka 9 tarik u Rymphang, 2025 – ar snem hadien ka jingïakynad jaidbynriew ha katei ka Jylla, ha ka Lah Sngi U Blei (31 tarik Lber, 2025) lyngba ka rynsan lad pathai ‘X’ u la kynnoh ïa u Lamphang barim ka Lok Sabha halor ka jingkyrshan ban phiah ïa ka thaiñ Shatei Lam Mihngi katkum ka jingdon ki jaidbynriew.
“U P.A. Sangma (Bam Kwai ha Dwar U Blei) shisien u la kyrshan ban phiah ïa ka Thaiñ Shatei Lam Mihngi sha ki Jylla kiba kham rit katkum ki jaidbynriew, ka jingmut kaba shyrkhei kaba la buh jingma ïa ka jingïatylli jong ka ri jong ngi. Mynta, ngi ïohi ïa ki jingpyrshang kiba kum kita ban tuklar ïa ki kam pohïing jong ka Manipur ban pyntlot ïa ka Jylla,” ong u Singh ha ‘X’.
Utei u nongïalam ba rangbah ka BJP u la bsut ruh ïa ka ‘Video’ barim jong ka jingkren u Purno Agitok Sangma ha Lok Sabha ban kyrshan ïa ki jingkam jong u.
Haba kdew ba ka jinglong-jingman ka Manipur ka long kaba pher, u Myntri Rangbah barim u la ong, “Kane ka Jylla (Manipur) ka dei ka jaka sah jong katto-katne ki jaidbynriew trai-ri rit paid kiba don jingma, kaba ka jingïada jong ki ka la dawa ïa ka jingpyntreikam jong ka Inner Line Permit (ILP). Ka jingeh kaba mynta kam dei ka saiñ pyrthei haba phai sha ka tynrai jong ka. Ka mih na ka jingkhleh lang jong ki jingeh ba har rukom: ka jingkynrei u drok, ka jingwan buhai shnong be-aiñ, ka jingpynjot ïa ki khlaw, bad ka jingkwah bor kaba ryntih da ki kynhun ba la jied.”
Da kaba kdew ïa u Conrad K. Sangma ha ka jingthoh jong u, u Singh u la thoh shuh-shuh, “Hadien bun ki snem jong ka jingpyrshang ban ïada ïa ki trai-ri trai-muluk, ngi la sdang ban kiew shaphrang shisha, kum ka jingpyntreikam ïa ka ILP, ka jingjop hadien ka jingïaleh kaba jwat. U Conrad K. Sangma u dei ban tip ba ka jingkulmar kam shym la long kaba shu jia hi; la pynmih da kito kiba sngew ba ki don jingma bad jingbymtikna na kane ka jingkiew shaphrang.”
Shuh shuh, u Singh u la buh jingkylli ïa u Myntri Rangbah ka Meghalaya la u tip ne em ïa ki lad jingïada ba la shim ha Manipur, da kaba ong, “Hato u Conrad Sangma u tip ne em ba ka Manipur ka la dep sdang ïa ka jingker khappud? Ba ïa ka Free Movement Regime (FMR) la pynbeit ryntih? Hato u tip halor ka jingmih ba ishyrkhei jong ki shnong bym ithuh hapoh u pud u sam jong ka Manipur?”
Haba kynthoh ïa ka jingtuklar ba nabar ha ki kam jong ka Manipur, da kaba ong, “Dei ban sngewthuh ba haba ka Manipur ka ïakynduh ïa kine ki jingeh kiba khraw, kiwei ki la kiar ban tuklar ha ki kam pohïing jong ngi. La khmih lynti ïa kajuh ka jinglong kaba burom, hynrei don kiba la jied da kawei pat ka lynti, kawei kaba la ïalam da ki jingmyntoi kiba khim jingmut ban ïa ka jingsngewkhia kaba shisha.”
Halor kane, u Conrad Sangma uba dei ruh u khlieh ka National People’s Party (NPP) – ka paralok ka BJP, u la kyntait ïa kitei ki jingkynnoh bad ïada ïa ka pateng jong u kpa jong u.
“… ka jingkren ba la dep jong u P.A. Sangma (Bam Kwai ha Dwar U Blei) ha kaba ïadei bad ka jingthaw ïa ki Jylla kiba kham rit na ka bynta ki kynhun bapher-bapher ka long haba ïadei bad ka jingdawa jong ki seng bapher-bapher kiba mihkhmat ïa ki jaidbynriew bapher-bapher,” ong u Conrad, u khun khatduh jong u Lamphang barim ka Lok Sabha.
“Ka jingpyrshang u Biren Singh ban pyni ïa ka jinglong-jingman, katba ka Jylla ka dang don hapdeng ka por kaba eh, ka long ka bym ïahap. Ka paw shai ba u kwah ban leh ïa ka saiñ pyrthei kaba jakhlia,” la pynphai ktien u Myntri Rangbah Jylla.
Da kaba kdew ba ka long kaba sngewsih ba u Singh u la sei madan ïa ka kyrteng u kpa jong u, u Conrad u la ong, u Lamphang barim ka Lok Sabha u ju ïakhun na ka bynta ki paidbah ka Thaiñ Shatei Lam Mihngi bad u la long u nongkyrshan ba radbah na ka bynta ki mat bapher-bapher bad ki hok jong ki paidbah ka thaiñ.
“Ha kum kane ka por, ka jingpyrshang jong baroh ka dei ban long na bynta ka jingwanrah biang ïa ka suk ka saiñ ha Manipur bad ym ban pynleit jingmut ha ki kam saiñ pyrthei. Baroh ngi hap ban ïatreilang. Nga kyrpad sa shisien ïa baroh ban trei na ka bynta ka jingbha jong ki paidbah ka Manipur. Kane ka dei kaba u P. A. Sangma (Bam Kwai ha Dwar U Blei) un jin da la kwah,” la bynrap u Myntri Rangbah.
