Nongpoh, Jymmang 24
Kawei ka kali kit nongpang (ambulance) kaba don ia u registration number ML01A0119 kala hap sha nala hadien ba kala shah tynrah ha kawei ka kali i20 kaba don ia u registration number AS01GG2500 kaba la jia mynta ka sngi u Blei.
Katkum ka tyllong khubor, la iathuh ba kane kala jia haka por kumba 2:00 baje eiei katba katei ka kali i20 ka dang thmu ban kiew sha nongbah Shillong, hynrei namar ka jingpynher sted palat pud, u nongniah um lah shuh ban teh lakam iala ka kali kaba u niah bad leit ban tynrah beit beit ia katei ka kali kit nongpang kaba dang pynieng harud ka surokbah National Highway 6.
Ha kane ka jingjia, la iathuh ba ym don satia ki briew kiba mynsaw naba ha ka por jong katei ka jingjia, ym shym la don briew satia hapoh katei ka kali kit nongpang bad u nongniah katei ka i20 ruh u lait na ka jingmynsaw, lait tang ka jingjulor jong baroh ar kitei ki kali na ki jaka ba ia tyngkhuh.
Ha kaba iadei bad kane ka jingjia, naka liang ki bor pulit ka thanad Nongpoh ki dang pynlong iaka jingtohkit khamtam ha kaba iadei bad ka jingkynnoh ba u nongniah katei ka kali i20 ula pynher sted palat pud iala ka kali.
