Ïashim bynta u Conrad ha ka jingrakhe dap 100 snem ka Tura Natya Samity

Tura, Jymmang 24

U Myntri Rangbah ka Jylla Conrad K Sangma ha ka sngi Saitjaiñ u la ïashimbynta ha ka jingrakhe dap shispah snem jong ka Tura Natya Samity, kawei na ki Cultural Institution kaba la rim bad ba burom tam hapoh ka thaiñ, kaba la pynlong ha phyllaw ka Samity ha Lower Babupara, Tura, kaba long u mawmer ban sah khana ha ka histori ha ka jingïaid lynti ba 100 snem jong ka ban kyntiew ïa ka mattithaw, dei riti, drama bad ka jingsuk jingsain ka imlang sahlang.

Ïa ka jingïalang plie la pynshongkun da u Myntri Rangbah kum u kongsan. Kane ka jingrakhe ka la kynmaw ïa ka spah snem ka jingaiti sha ka jingpynneh pynsah ïa ka deiriti, ka jingtbit ha ki kam ak drama, bad ka jingshakri ïa ka imlang sahlang naduh ba seng ïa ka Samity ha u snem 1926.

Haba ai jingkren ha ka jingïalang, u Myntri Rangbah u la ai khublei ïa ki dkhot bad ki nongkitbok jong ka Tura Natya Samity halor ka jingkynjoh ïa u mawmer ba 100 snem bad ai burom ïa ki pateng jong ki nongïalam, ki barikor, ki nongkitkam bad ki dkhot kiba la noh synñiang sha ka jingïaid lynti jong ka Samity ha kine ki shispah snem bala leit.

“Kane ka long shisha ka sngi kaba khraw, bad ngi rakhe ïa une u mawmer, ka long ruh kaba kongsan ïa ngi ban phai dien ïa ka lynti ïaid kaba phylla ha kine ki 100 snem bala leit,” ong u Myntri Rangbah. U la ong ba ka Samity ka ïeng mynta namar ka jingpyrshang ba khlem thait bad ka jingaiti lut jong ki President barim, ki Secretary, ki Barikor bad ki dkhot kiba la aiti ïa la ki jingim ban pynkhlaiñ ïa ka Samity bad ban pynneh pynsah ïa ka deiriti da ki pateng la pateng.

U Myntri Rangbah u la ban jur ba ka Tura Natya Samity kam dei tang ka seng ba pynneh ïa ka dei riti hynrei “ka nongsumar ïa ka pateng jong ngi bad ka nongsakhi ba im ïa ka histori” kaba la sakhi ïa ka por ka British India, ka jinglaitluid ka Ri India, ka jingpynkha ïa ka Meghalaya, bad ka jingkylla ka Meghalaya ba mynta haba ïaineh ha ka mishon ban pynneh ïa ka deiriti.

Haba pynpaw ïa ka bynta bala shim da ka Samity, u la ong ba naduh ba seng ïa ka ha u snem 1926, ka Samity kala lamkhmat ïa ki kam ak drama, ka rwai ka siaw, ka shad bad ka thoh ka tar ha ka thaiñ, haba saiñdur ïa ki pateng ki barikor, ki nongput nongtem, ki aktor bad ki nongthoh kot.

Haba kdew ïa ka jingnang paw ka Meghalaya ha ka put ka tem bad ki kam pynbyrngia, u la ong ba ka Shillong, kaba ïatip mynshuwa kum ka “Rock Capital of India” kala long mynta kum ka “Music Capital ka India”. U la ïathuh ba ka Meghalaya kala long kawei na ki jaka ba hakhmat tam na ka bynta ban pynlong ïa ki Live Concert hapoh ka Ri, kaba la pynlong ïa bun ki concert jong ki nongrwai ba pawnam ka pyrthei kum ka Def Leppard, Bryan Adams, Ed Sheeran, Europe, Akon bad ka Script.

“Kane ka pyni ba kumno ka deiriti kala long ka pyrnon ba pun hapdeng ka riti dustur bad ki kabu ka pyrthei,” u la ong.

Ha kane ka sngi, u Myntri Rangbah u la pynbna ïa ka jingïarap song pisa ba T.25 lak na ka bynta ka jingshna bad pynkhlaiñ ïa ki jingtei ha Tura Natya Samity.

Kum shibynta jong ka jingrakhe, la pynlait paidbah ruh ïa ka souvenir ba buh jingthoh ïa ka histori ba riewspah bad ki kam jong ka Samity.