Shillong, Jymmang 24
Ka shnong Lapangap, West Jaintia Hills District kan sa shim rai mynta ka taiew la kan tur biang sha Secretariat ne kan shim noh da kiwei ki lad ki lynti namar haduh mynta kim pat ioh lad ban leit rep ha ki lyngkha namar ka jingkhang ki jaidbynriew Karbi kiba sah ha Assam.
Katkum ki khubor ba la ioh lum u Waheh shnong ka shnong Lapangap u la khot ia ka dorbar ha ka 23 tarik Jymmang 2026 hynrei ki duna kiba wan namar ka dei ka sngi ba leit iew kumta la pynsangeh noh bad ban pynlong biang mynta ka taiew ban shim noh da kiwei ki sienjam na bynta ban pynbor ia ka sorkar ban ioh leit rep ia u kba bad kiwei ki mar rep sha lyngkha jong ki kaba don markhap bad ka jylla Assam.
Ki khubor kiba la ioh lum la iathuh ba ka shnong Lapangap ka lah ban shim rai biang sa shisien ban wan tur sha Secretariat ban pynbor ia ka sorkar jylla ban iakren biang bad ka sorkar Assam haduh ba kin ioh rep sha ka lyngkha jong ki namar mynta ka dang dei ka por puh ia ki hali bad por thung ia u kba.
Ka jingeh ki nongshong shnong ka Lapangap ka dei namar hadien ba ki la wan tur sha Secretariat ki la ioh ka jingkmen kaba shipor haba ka sorkar ka la kular ban ailad ia ki ban leit rep hynrei haba ki la poi sha shnong ban leit rep ki la iakynduh jingeh namar ki jaidbynriew Karbi kim shah ban wan rep.
Shuh shuh ki nongshnong shnong Lapangap ki la rai ban tur beit ban leit rep ha kane ka taiew hynrei ki hap ban kynrandien namar ki shah siat da ka jri ha ki paidbah Karbi.
