Shillong, Jymmang 24
U Kpa jong u Trophimos, kata u Bah Netnobiweit Khongsdoh u la ong “Nga pait ka dohnud haba ïohi ïa ka met u khun ba ka la julor, ki shyieng ki la pra bad kdiah lut.
Katei ka jingïohi jong u ïa kamet jong u Trophimos, kadei myn ha ka 18 tarik u Jymmang, 2026, ha ka por ba la khot ïa u ban pynthikna, la kadei ne-em ka metïap jong u khun jong u, u Trophimos Khong-mawloh, ïa kaba la khlong ban leh ïa ka Spot Post Mortem ha Pynter.
Haba ïakren bad u Bah Netnobiweit (kpa u Trophimos) u la ong ba ka met ha ki bynta krung ka jngem naduh ka dur khmat, ki kti bad ki lybong, kaba kum u kpa um lah mutdur ïa ka jingjubor ka jingshah bom jong u.
U Bah Netnobiweit u la ai ka jingkhublei ïa ka jingshim khia ki bor aiñ, ban sngap ïa ka jingmudui jong u pyrshah ïa u Rangbah Shnong bad Village Defence Party (VDP), kiba u la kdew ba dei ma ki, kiba la bom la tied ïa u khun jong u, haduh ba un da ïap, ym kumba la kynnoh ba u pynïap ïalade da kaba bam ïit.
U Bah Netnobiweit u bynrap pat ba u buh jingngeit ha ka aiñ bad khmih lynti ba ka kaiphod Post Mortem kan mih kloi noh, khnang ba ka jingdawa jong u ïa ka hok longbriew manbriew u khun jong u kan paw shynna.
Katei ka jingkhlong ïa ka metïap bad leh Spot Post Mortem, ka long hapdeng jingïaid ka jingtohkit halor ka jingkynnoh ba u ïap, namar ka jingshah bom jingshah tied ha Iingdorbar Shnong Pynter ha ka miet 07 tarik u Iaïong, 2026.
Ia ka met u Trophimos, la tep ha ka 09 tarik u Iaïong, 2026, hadien shi sngi ba la kynnoh, pynpoi ïa ka met ba sah jong u da ki dkhot VDP, kata ha ka step 08 tarik u Iaïong, 2026 bad ka jingkhlong ïa ka metïap jong u ka dei hadien 40 sngi ba la tep ïa ka.
La tep ïa ka met ba Bah Trophimos hapdeng ka jingpyrkhat, ba ka jingïap jong u, kadei na ka jingpynïap dalade ïalade, kata da kaba bam ïa ki ïit.
Hynrei jan shi bnai hadien, la paw ka durkhih (video) kaba pyni ïa ka jingbom jingtied ba shyrkhei ïa u wei u briew bad u Bah Netnobiweit u la ujor, ba uba shah bom u dei u khun jong u bad shim ba ka jingïap u khun jong u, kadei na katei ka daw.
U Bah Netnobiweit u la ong ba ha ka step 08 tarik ka khun jong u ka wan ïathuh, ba la wanrah ïa ka metïap u Trophimos da ki dkhot VDP bad haba u la leit peit, u la lap ba ka dur khmat bad khlieh u khun jong u, ka la phlei snam, la pynthiah khlem syngkhlieh bad la shu kyllaiñ da u shylliah ba ïong, ka byrni khaw bad halor metïap pat da ka plastic dewbilat lem ka juti.
“Hynrei ha katei ka por, ym don ka sakhi kaba biang bad bun kim lah ban ong, la kadei shisha ba u Trophimos u pynïap ïalade, da kaba bam ïit ne don da kiwei-kiwei pat ki daw,” la ong u Kpa.
Ha ka jingpaw ka durkhih, la bud pat da ka Zero FIR ha ka 05 tarik u Jymmang, 2026, ha Sadar Police Station, Shillong bad u Bah Netnobiweit u la shah khot ha ki bor pulit ka Pynursla Police Station, myn ha ka 09 tarik u Jymmang, 2026, ban shah shim jingtohkit.
U kpa u la ong, ba ha ka jingleit jong u ha Pynursla Police Station, u la kynnoh ba don kiba pyntieng kiba ong ïa u, ba lada Post Mortem bad lap ïit na ka metïap jong u Trophimos, kan dei ka jingeh ïa u, hynrei kum u kpa u la ong ba ai kan long katba long.
Shuh shuh bud na kane, la ïoh jingtip ba ki don 9 ngut ki briew ba kynthup ïa u Rangbah Shnong, u Bah Fullmoon Khongsdoh, kiba la shim jamin lypa lane anticipatory bail, na ka District Council Court.
Kumba long, kane ka mukotduma kan dang ap ïa ka kaiphod Post Mortem, ka ban batai pat ïa ki bor pulit la kin kem ne-em ïa ki briew, kiba la shah kdew donkti kiba ïaid laitluid mynta da ka anticipatory bail.
Kiwei pat kiba don lang bad u Kpa u Trophimos, watla kim kwah pynithuh dur, ki la ïathuh ba ha ka step 08 tarik u Iaïong, 2026, don ki khynnah samla shnong kiba leit shim shuki na ïing shnong bad lap u Trophimos u thiah hapdeng ka snam bad ka jinglyngkhuit shiteng bad ki suba pat ba u la dep ïap.
Kumta la pyrkhat ba mar ïa wan ïalam na Sub-Centre, la bret ïa u ha ïing shnong bad ieh haduh ba un da eh ka met na ka jingbym don mynsiem shuh bad dei tad haduh ba lap kitei ki samla, kiba la ïathuh sha ka shnong bad VDP, kiba la leit shim ïa ka met bad wanrah sha ïing sah u Trophimos.
La don ruh kiba ïathuh ba don ba u baton ne u lathi, uba la pait ha Iingdorbar bad lada kadei ba u pait haba bom ïa u Trophimos, ka mut ka jingbom jingtied kadei kaba la shyrkhei haduh katta-katta.
