Nongstoiñ, Jymmang 24
Ka ophis jong u Acting Syiem ka Hima Nongmynsaw Syiemship hapoh ka jingïalam u bah Phlowing Syiem Nongbah Acting Syiem ryngkat ka jingïasynran lang u bah Johnes Sohshang, secretary bah Donbok Snaitang Joint Secretary ka Hima Nongmynsaw ki la ïoh ban aiti da ka jingthoh sha u CEM ka KHADC halor ki katto katne ki mat ba don kam na kabynta ban nang pynkhlain shuh shuh ia ka jingtrei kam jong ka Hima.
Ïa katei ka jingthoh na kaliang jong ka Hima Nongmynsaw kala ïoh ban aiti sha u CEM ha kine ki khyndait sngi ha ka jingïakynduh bad ki nongkitkam jong ka Hima ïa kaba la pynlong ha ophis u Acting syiem ka Hima Nongmynsaw Syiemship ha Langpih West ha ka jingdonlang ruh ki MDC .
U bah Donbok Snaitang Joint Secretary ka Hima Nongmynsaw Syiemship, ha ka jingdonlang ruh u Bah Johnes Sohshang secretary, u Acting Syiem ka Hima u bah Phlowing Syiem Nonbah bad ki wei ki wei u la ong ba ha katei ka jingiakynduh na kaliang ka Hima kala ioh ban aiti ia ka jingthoh sha u CEM ha kaba ki mat ia kaba la buh ki kynthup ban dawa pynrung dkhot ba pura ïa ka Hima sha ka Regional Border Committee, ka West Khasi Hills District Phase – II kaba dei kawei na ka kynhun kaba ju shong ban ïa phylliew jingmut haba ïadei bad u pud u sam na ka bynta ban ïa pynbeit bad ka jylla Assam, namar kat haduh mynta ïa ka Hima la ñiew tang kum ka dkhot kaba shu pynïasoh ne ka Associated Member.
Shuh shuh u la iathuh ruh ba haba ïadei bad katei ka phang ka Hima ka la dep ban ai jingthoh ruh ha u snem 2023 sha ka Regional Border Committee lyngba ka ophis jong u Deputy Commisioner, West Khasi Hills, hynrei ym shym la ñiewkor ïa ka jingthoh bad kat haduh mynta ka Hima kam pat shym la ïoh kano kano ka jubab.
U la bynrap ruh ba “lait ka Hima mano ba kham tip shuh shuh ia u pud u sam jong ka Hima”
U la ong ruh ba sa ka wei pat ka mat kalong ba ka Hima ka la dep ruh ban dro ïa ka Map da kaba leh lyngba ka GPS bad ka la pynbiang lut ïa ki kot ki sla kiba don jingïadei bad u pud u sam, kumta ka Hima ka la kyrpad ruh ïa ka Council ba kan ithuh ne mynjur ban pynskhem noh ïa ka Map kaba la kdew da ka Hima Nongmynsaw Syiemship.
Nangta, sa ka wei pat ka Hima ka kyrpad ruh ïa ka Council ba kan mynjur noh ruh ïa u Acting Syiem Phlowing Syiem Nongbah kum u Syiem ba pura jong ka Hima Nongmynsaw Syiemship namar kat haduh mynta u dang dei tang u Acting Syiem .
U bah Donbok Snaitang u la iathuh ba na kaliang ka Hima kala ai ruh ia ka jingthoh lane ka shithi sha u CEM ka KHADC ban pan jingiarap ban shna ia ka ophis trei kam jong ka Hima namar haduh mynta la shu shim wai ia ka iing ban pynlong jaka trei kam jong ka Hima .
U la iathuh ruh ba hadien ka jingia kren bad u CEM ka KHADC ha kaba iadei bad ka jingmynjur ia ka map jong ka Hima na kaliang u CEM u la kular ban phah ia ki nongtrei ka KHADC ban pynshisha bad hadien katta lada kam don kano kano ka jingpynwit na kaliang ka KHADC kan sa aprove ia ka map jong ka Hima.
