Shillong, Jymmang 24
Hadien ki Hynniew tylli ki kot ba u Bah Remiwell Majaw u la dep ban thoh bad ïoh ban pynlait paidbah, ha kane ka kynti u la ïoh ban pynlait paidbah sa artlli ki kot ïa kaba u la ai kyrteng “Nga la rai” bad “Na ki Khana shongnia sha ki Symboh pyrkhat Shongsbai”
Ïa kine ki artylli ki kot la ïoh ban pynlait paidbah ha ka sngi Saitjaiñ da ka Kong Streamlet Dkhar kaba dei ka nonghikai Khasi hapoh ka Skulbah NEHU bad ha kane ka sngi la ïa donlang kiba ha ïing hasem jong u Bah Remiwell Majaw u ba dei u nongpynmih bad u nongthoh jong kitei ki kot.
U Bah Remiwell haba ai jingkren ha ka jingïalang ba lyngkot kaba la long ha ïingsah jong u kaba don ha Mawlai Nongpdeng, u la pynpaw ba u la sdang ban pynleit jingmut ha ka kam thoh kot naduh u snem 2006 bad baroh ki kot ba u la thoh haduh mynta ki la poi sha ka khyndai tylli ba kynthup ïa ka “Nga la rai” bad “Na ki Khana shongnia sha ki Symboh pyrkhat Shongsbai”.
Shuh-shuh u la batai ba ka kot ba u la ai kyrteng “Nga la Rai” ka dei kaba la pynwandur kum kam ‘novel’ katba ïa ka kot ba u la ai kyrteng “Na ki Khana shongnia sha ki Symboh pyrkhat Shongsbai” la pynwandur ha ka dur jong ki Khana Lyngkot.
Shuh-shuh u la ïathuh ba ka kot ba nyngkong ba u la lah ban pynmih ka dei kaba u la ai kyrteng “Ki jingpang bad ki Dawai Khasi” bud sa ka “Kot Hikai ban Pynkoit” “Ka kam Shakri ha ki 50 snem” “ki Syrwet ba la Jah” bad sa bud sa kiwei-kiwei de ki kot kiba u la dep ban pynmih ha kine ki snem kiba la dep.
Ka Kong Streamlet haba ai jingkren ka la ai ka jingïarah ïa ka jinglah jong u Bah Remiwell ban pynwandur ïa ki kot jongu la ka dei ha ka liang ka poitri lane kaba ïadei bad ki jingïathuh khana, watla um dei u nonghikai lane u riew wat bniah hynrei kiei kiba u thoh ha ki kot jong u ki dei kiba kyrsoi napoh ka dohnud bad ka jingdon sap jong u.
Haba phai pat haba ïadei ki artlli ki kot ba dang shu pynmih, ka Kong Streamlet ka la pynpaw ba ka la dep ban pule bniah ïa ki jingthoh kiba u nongthoh u la pynpaw bad kaba lah ban jia ha kano kano ka por bad ha kino-kino ki jaka jong ka pyrthei kumjuh ki nongpule.
“Kaei kaba u nongthoh u pynpaw bad pynwandur, jingim briew kam dei ban long ka jingduh jingkyrmen, watla kiba bun ki jingeh, ka duk, ka jynjar, ka shitom kin wan ym ju dei ban duh jingkyrmen, namar uwei pa u wei u briew u Blei u la don la ka jong ka jingpynmang” la ong ka kong Streamlet.
Ka la ai ki kyntien kitbok kitwriang ïa u Bah Remiwell ba un dang shait dang khlaiñ hapdeng ka rta jong ka jinglongtymmen kaba u la kynjoh sha ka 70 snem bad kyrmen ruh ban un dang lah ban noh synniang shuh-shuh ïa kiei-kiei sha ka jaitbyndriew lyngba ki kot ba u la thoh bad pynmih.
