Shillong, Lber 31
U Myntri ka Sorkar Jylla, Bah A.L. Hek u la pynpaw ka jingsngewkhia halor ka jinglong-jingman ka North Eastern Hill University (NEHU) bad ban jur ba dei ban pynbeit noh kloi ïa kane ka jingeh khnang ba kan ym ktah ïa ki samla kiba pule ha kane ka skulbah.
“Na ka liang ka BJP (jong ka Jylla), ngi la ïakren halor kane bad dang myn ha kane, nga la dep ïakren bad ka seng – u President bad katto-katne ngut ki dkhot ha kaba ki la ong ba ka long kaba eh ba u Prof. P.S. Shukla un bteng biang kum u Vice-Chancellor (VC) ka NEHU,” ong u Bah Hek.
U la ong ruh ba kum ka seng kan sa rah ïa kane ka mat sha Delhi ban pyntip sha u Myntri ka tnad pule-puthi ka Sorkar Pdeng, u Dharmendra Pradhan ba uba bun balang jong ka skulbah kim sngewtynnad shuh ïa ka jingwan phai biang jong u Prof. Shukla kum u VC.
Haba kdew ba na ka liang ka Sorkar Pdeng ha kine ki khyndiat sngi ba la dep ka la thung ïa 2 ngut ki Pro-VC – ha Shillong bad Tura, u Myntri u la ong, “Nga ïohi ba ka don hi ka jingïaid shakhmat jong ki kam, bad nga ngeit ba ki dei ban pynbeit noh kloi ïa kane ka mat namar ka la nang jur bad pynsniew dur ïa ka jinglong-jingman hapoh ka skulbah bad ktah ruh ïa ka jingpule jong ki samla.”
Haba kylli, u la ong, “Ngi la dep ïakren halor ka kaiphod bad pynsngew sha ki nongïalam ba halor jong ka seng ba kano-kano ka rai, dei ban shim noh kloi khnang ba kan ym ktah pat ïa ka bha ka miat jong ki samla pule.”
Halor ka jingpyrshah jong kiba bun haba ïadei bad shah thung Pro-VC ka Prof. S.M. Sungoh ha Shillong, u la ong, “Tang ban pynïaid beit ïa ka NEHU bad ba kan ym ktah eh ïa ka jingpule ki samla, dei ban ai lad ïa i shipor ban trei ïa ka kam kaba la bynshet na bynta ka bit ka biang jong ka samla bad skulbah hi baroh kawei.”
Na ka liang u Bah Hek, u la ïathuh ruh ba ka seng ka la dep phah ïa ar tylli ki shithi kiba la phah lyngba ka NEHUSU bad NEHUTA, sha u Myntri Sorkar Pdeng (ba dei khmih) khnang ban ïoh leh ïa kaba donkam.
“Ngim pat ïoh ïa kano-kano ka rai. Ngin buddien ban pynkut noh ïa kane khnang ban ym wanrah kano-kano ka jingeh ïa ki samla pule,” u la ong.
Hashuwa, ha ka jingleit ïakynduh jong ka seng ïa ki samla pule, ki nonghikai ka NEHU, u Myntri u la ong ba ka seng ka la ïakren halor ka bha ka miat jong ki samla kiba pule ha kane ka skulbah.
“Ngi la ïohi ba ka don bun bah ka kynrum-kynram bad ka jingpyrshah ïa une u VC ba mynta. Hadien kata, ngi la pyrshang ruh ban kren sha ka Sorkar Pdeng ban pynsngew ba kan shem shitom hi ïa u ba un bteng biang kum u VC,” u la ong.
Shuh shuh u la bynrap ba ki la don ruh ki samla pule kiba la wan ïakynduh ïa u ha ryngkat ka KSU, NEHUSU ban pynsngew ba kim kwah shuh ïa une u VC ban don ha NEHU.
“Mynta lei wat ka Mawlai Town Dorbar ruh ka la pyrshah ïa ka jingwan rung u Prof. Shukla sha ka thaiñ Mawlai,” u la pynkynmaw.
