Shillong, Lber 31
Ka Meghalaya Power Distribution Corporation Limited (MePDCL) ka la pynbna ba ka la pynjlan ïa ka jingpyntreikam ïa ka One Time Settlement (OTS) Scheme 2025 sa shi bnai ban plie lad ïa ki nongthang bording ilektrik ba kin ïoh por ban siew ïa ka bai thang bording kaba dang sahteng.
Ka MePDCL ka la buh ïa ka tarik kaba khatduh ban pyntreikam ïa ka OTS haduh ka 31 tarik u Lber 2025 bad mynta la pynjlan ïa kane ka scheme haduh 30 tarik u Ïaïong 2025.
Ïa katei ka rai la shim hadien ba ki la don bun bha ki briew kiba la ïashimbynta ha katei ka scheme naduh ba la sdang pyntreikam ïa ka da u Myntri Rangbah ka Jylla, Conrad K Sangma ryngkat bad u Myntri ka tnat Bording, AT Mondal ha ka 4 tarik u Lber 2025.
Ka MePDCL ka la pynwandur ïa ka OTS Scheme 2025 ban pynsting ïa ka jingkhia jong ka jingsiew na ki nongpyndonkam bording kiba hap ha ka Domestic bad BPL kaba long hapoh jong ka 5KW bad kiba la shah ot noh ka bording namar ka jingbym siew ïa ka bai thang bording.
Hapoh kane ka scheme, ki nongshim bording ki lah ban shim ïa ka 100% Waiver halor ka Delay Payment Surcharge (DPC) ne ka jingslem ban siew pyndep ïa ka bai thang bording bad ki lah ban jied ban siew shisien siew ne ban siew khyndiat-khyndiat da ka Instalment kaba khlem donkam shuh ban siew ïa ka ram.
Ki la don baroh 12,262 ngut ki nongshim bording kiba la pynrung kyrteng haduh mynta bad ka pisa kaba ki dei ban siew ka long T.15.97 Klur, ha kaba T.11.13 Klur ka dei ka dor trai bad T. 4.84 Klur ka dei kaba la dep ban mab noh.
Ka jingpynjlan ïa kane ka OTS Scheme 2025 haduh ka 30 tarik u Ïaïong 2025 ka long ban ailad ïa ki nongshim bording ba kin ïoh siew pyndep ïa ka bai thang bording kaba dang sahteng bad ban pyllait na ka jinghap ban siew ïa ka kuna. Ha ka kyrwoh khubor, ka MePDCL ka la kyntu jur ïa baroh ki nongthang bording ilektrik ba kin shim kabu ïa katei ka jingpynjlan ïa ka scheme bad ban siew pyndep noh ïa ka bai bording jong ki, kiba long ha ki kyndon kiba biang.
Ban ïashimbynta ha katei ka scheme, ki nongshim bad thang bording ki lah ban leit ha ka ophis jong ka MePDCL kaba don hajan lane ban phone ha u Toll-Free Number 1912 ban ïoh ïa ki jingtip kiba bniah bad ban pynrung kyrteng ïalade.
