Jowai, Lber 31
Ka kam tuh kam thiem ka la nang jyllei na ka por sha ka por bad ki pulit ki la ïoh ïa ki jingujor ha kaba ïadei bad ka jingshah tuh ki kali ar shaka ne scooty, bike, tyndong shet jingshet bad kiwei kiwei ki mar ha ïing briew.
Kawei na ki kam tuh kaba kham thamula ka long ba ha kane ka sien ki nongtuh ki la rong tuh ïa baroh saw tylli ki shaka (tyre) jong ka kali bad iehnoh ïa ka kali khlem shaka kaba la pynïeng harud surok ha Mihmyntdu, West Jaiñtia Hills District.
Kane ka jingjia ka la jia ha ka step 30 tarik Lber, ha kaba u trai ka kali kamai Maruti Celerio kaba don ïa u registration number ML04-D-5287, u la pynïeng ïa ka kali harud surok, hynrei ki runar ki la law bad rong tuh tang ïa ki shaka baroh saw tylli kiba dei ki ‘alloy wheel’ bad iehnoh ïa ka kali khlem shaka. Na ka liang ki nongïalam Shillong Guwahati Tourist Cab Association (SGTCA), West Jaiñtia Hills District ki la kyrpad ïa ki paidbah ba lada lap ïa kino-kino kiba tyrwa die shaka ne alloy, la kyntu ban pyntip mar-mar sha ka seng lane sha ki bor pulit.
