Shillong, Lber 31
Ka jingdon jong ka khyrdop ka tnat Khlaw (Forest) jong ka Khasi Hills Autonomous District Council (KHADC) ha ka thaiñ Puriang, la kynnoh ba ka la don bynta ha ka ban khrong bad lum pisa beaiñ ym tang na ki kali kit rnga hynrei na ki kali kit jingkit ne kit mar baroh.
Ha kaba ïadei bad kane, ka Hynñiewtrep Integrated Territorial Organisation (HITO) Mawryngkneng Circle ha ka step jong ka 31 tarik u bnai Lber, 2025, hapoh ka jingïalam jong u Bah Gary S Myrboh kum President bad u Bah Balashem Nonglait kum Secretary, hadien ba ki la ïohpdiang ïa ki jingujor na ki paidbah halor ka jingdon ka jinglum pisa beaiñ da katei ka khyrdop ka KHADC ha Puriang, ka seng ka la leit mar-mar ban jurip dalade ïa katei ka khyrdop.
Na ka liang ka seng ka la ong ba ynda ka la poi ha katei ka jaka, ka la lap shisha ba ka don kum kata ka jinglum pisa beaiñ da ka khyrdop talasi jong ka tnat Khlaw na ki kali ki bym dei ban lum khajna da ka District Council.
Ha katei ka jingjurip da ka HITO, ka la lap ruh ba ka don kawei ka kali Pickup kaba kit rnga kaba la kynnoh ba ka la shah pan pisa haduh T.5 hajar ha ki briew kiba ap shabar jong ka khyrdop talasi ka tnat Khlaw bad ka seng ka la lap ruh ba u ophisar jong ka tnat Khlaw um don satia bad kitei ki nongtrei ruh kim don satia ha ka jingphong ïa ki ‘uniform’ hynrei khlem jingsalia ki la dawa bad pan beit haduh T.5000 na katei ka kali Pickup.
Na ka liang ka seng haba pyrshang ban ïakren bad kitei ki briew kiba donkti ha ka ban khrong pisa beaiñ kiba la pyndonkam da ka Maruti rong ïong, ki la kyntait ban pyntip ïa ka kyrteng jong u nongshim wai ïa katei ka khyrdop talasi bad ki la ong pynban ba kitei ki kali ki dei ki kali kiba kit beaiñ ïa ki mar.
Ha katei ka jingïakren, ka la mih ruh ka jingïania kaba jur bha hapdeng uwei u briew uba la kam ïalade kum u nongtrei jong ka khyrdop talasi bad u President ka HITO Mawryngkneng Circle.
Ka HITO ka la ong ba kane ka jingpan pisa beaiñ jong kine ki briew kiba kam ïalade ba ki dei ki nongtrei jong ka tnat Khlaw kam long kaba ïahap namar kam mut ba lada ki pan pisa ma ki na kitei ki kali beaiñ, kitei ki kali kin nym long beaiñ shuh.
Shuh-shuh, ka seng ka la ong ba ka dawa na ka KHADC ba kan leh eiei halor kane bad ban pynshitom mardor ïa kino-kino ki briew kiba donkti ha kane ka kam namar kane ka jingshim kabu jong ki ‘riewshimet kan pynduhnong ïa ka khajna jong ka Jylla bad jong ka District Council hi baroh kawei bad khamtam eh kan ktah ïa ka kamai-kajih jong ki paidbah.
“Ngim tip ba ka dei ka EC barim ne ka EC bathymmai kaba pynïaid ïa katei ka khyrdop talasi ka tnat Khlaw jong ka District Council ha Puriang hynrei ngi dawa ba ka KHADC ka dei ban leh eiei halor kane bad ban pynsaja ïa ki briew kiba donkti namar ka jingleh jong kine ki ‘riewshimet ka pynduhnong ïa ka khajna jong ka Jylla bad ka District Council bad khamtam eh ka ktah ïa ka kamai-kajih jong ngi ki ‘riew paidbah”, ong ka Seng.
Na ka liang ka Seng ka la dawa ruh ba kitei ki briew ki dei ban pyni ïa ki sakhi halor ka jingkam jong ki, ba ki don ïa ka ‘Work Order’ ka ban lum ïa u rnga haduh 10 muna bad ban pan pisa T.10 hajar na kawei ka kali ka ban ktah pat ïa u ‘riew paidbah lyngba ka jingtuh bad jinglute jong ki.
Halor kane, ka seng ka la leit ban pyntip ruh sha ka tnat pulit halor kane ka jingdon ka jinglum pisa beaiñ ha katei ka jaka.
