Shillong, Lber 31
U MLA ka South Shillong konstitwensi, Bah Sanbor Shullai ha ka Lah Sngi U Blei u la plie ïa ka surok kaba la shna thymmai kaba la tip kum ka Tendro Ryntathiang Road kaba don ha ka shnong Lower Lumparing kaba mih shaduh sha Dhobi Ghat, Laban.
Ïa kane ka surok la shna ha ka jinglut kaba kot T.4,72,69,000 da ka tnat PWD (Roads), bad kaba jrong kumba 0.281 km naduh na ka jingkieng Kong Nora Hynñiewta bad Bah Ekindro Diengdoh shaduh Dhobi Ghat kaba don mar pyrshah ïa u Transformer ka MeECL ha Mawnei, Lower Lumparing.
Shwa ban plie ïa kane ka surok la pynlong ruh ïa ka kñia ka khriam bad hadien kane u Bah Sanbor u la plie ïa kane ka surok da kaba khap ribon ryngkat ka jingdonlang u MDC ka Laban, Bah Ricky Shullai, u Executive Engineer ka PWD (Roads) Shillong Central Division, Bah S Lytep, u Rangbah Shnong ka Upper Lumparing, Bah HB Wahlang, u Rangbah Shnong ka Lower Lumparing, Bah D Shabong, ki nongïalam shnong ka Riat Laban Pyllun, ki bahaïing jong u Bah Tendro Ryntathiang (bam kwai ha dwar u Blei) bad ki paid nongshong shnong.
Ki nongkren ha kane ka jingïalang ki la ïaroh ïa u Bah Sanbor Shullai uba la shim khia bad trei shitom ban pynïoh ïa katei ka surok kaba long kongsan bha ïa ki paidbah kiba sah ha Lower Lumparing namar baroh shi katta ki la hap ban ïaid na ka surok kaba kyllaiñ bad kaba jrong bha, hynrei mynta da ka jingïoh ïa kane ka surok kaba thymmai ka la pynsuk shi katdei ïa ki nongshong shnong namar ki kali ki la lah ban ïaid na kane ka surok ha ka kit ka bah.
U Bah Sanbor Shullai haba kren ha kane ka sngi u la ai jingïaroh bad jingkhublei kyrpang ïa ki trai jaka kiba la tyrwa jynsur mynsiem ban ai sngewbha ïa ka jaka na ka bynta ban shna ïa ka surok ka ban pynsuk lang ïa baroh ki nongshong shnong.
Nalor kane, u la shim ruh ïa ka kabu ban ai khublei ïa ki paidbah kiba la pynjop ïa u Bah Ricky Shullai ha ka ilekshon MDC kaba dang shu dep, hynrei u la pynpaw pat ïa ka jinglyngngoh ba ki briew kiba ïakhun ïa ka ilekshon wat la kim shym la leh eiei ne noh synñiang eiei na ka bynta ki paidbah ki la ïoh bun bha ka vote. Nangta na ka liang u MLA u la kyntu ïa ki paidbah ba kim dei ban shet kylla ïa ki briew kiba la leh bha namar ba wat ha ki kot niam bakhuid ruh ki la kdew shai ba ym dei ban shet kylla ïa kito kiba la leh bha ïa ki.
U Bah Sanbor u la ong ruh ba wat lada ki paidbah kim shym la kyrshan ha ka ilekshon, hynrei ka ïing jong u kum u MLA bad ka ïing u Bah Ricky Shullai kum u MDC, kin ïai bteng ban ai ka jingshakri kaba baroh 24 kynta ïa baroh ki paid nongshong shnong ka konstitwensi.
