Nongstoiñ, Lber 31
Ka All Lyngngam Organization (ALO) kawei na ki seng ha ka thaiñ Ri Lyngngam, ka la khie im biang mynta u snem 2025 ha kaba kane ka seng myn ha ka sngi Saitjaiñ jong ka taïew ka la ïoh ban pynthymmai noh ïa ki nongkitkam na ka bynta ka samoi treikam jong u snem 2025-2028.
Ïa ki nongkitkam jong kane ka seng la ïoh ruh ban pyntian smai da u Bah Kwirinus Mawsor uwei na ki nongseng ba nyngkong eh ïa katei ka seng.
Lah ban kdew hangne ba ïa ka ALO la seng ha u snem 1986 da ki katto-katne ki samla ka thaiñ Ri Lyngngam kiba kynthup ïa u Benjamine Mawsor (bam kwai ha dwar U Blei), u Lidrikshon Shyrkon, u Coneleos Nongbri, u Kenedy Hashah bad u Kwirinus Mawsor bad kiwei kiwei bad mynta kane ka seng ka la kynjoh sha 40 snem.
La ong shuh shuh ba ka jingthmu jong katei ka seng na ka bynta ka Ri Lyngngam ka long ban wanrah ïa ka jinglong shipara hapoh ka Ri Lyngngam, ban kyntiew ïa ka pule puthi ha kaba ka ALO ka la dep ruh ban seng kawei ka skul ha Nongkulang, bad khamtam eh ka seng ka buh ïa ka thong ban pynneh pynsah ïa ki riti ki dustur u Lyngngam kumjuh ban pynneh pynsah ïa ka rukom bat khyndew ki Lyngngam bad kiwei kiwei.
Ïa ka jingïalang pynskhem ïa ki nongkitkam la pynlong ha Vani Hall Pyndengrei, Nongstoiñ bad la ïadonlang ruh bun ki kynrem ki lyndan jong ka thaiñ Ri Lyngngam kiba kynthup naduh u Bah Pius Marweiñ MLA/MDC ka Ranikor kum u kongsan, u Bah Methodious Dkhar, MLA ka Mawshynrut kum u symbud kongsan, bad la synranlang ruh da u Bah Srally Rashir, MDC ka Mawshynrut bad kiwei kiwei. Ha katei ka sngi, u Dr. Bostick Mawsor u la shah jied kum President, u samla Bendrowell Hashah kum Secretary kiba la shah pynskhem lang ha ryngkat kiwei pat ki para nongkitkam.
Ha katei ka sngi la pynphuh-pynphieng ïa ka jingïalang da ki jingrwai, jingshad ba la pyndonkam ruh tang da ka ktien tynrai bad la pynkut da ka jingai khusnam ïa ki ‘riewpawkhmat jong ka Ri Lyngngam ïa kaba la tip ruh kum ka Khusnam Kynmaw Tympang 2025 bad ki nong ïoh ïa ki khusnam ki kynthup naduh u (L) Risen Mawsor MLA, MDC banyngkong napdeng ki Lyngngam, kiwei kiwei ki MLA/MDC barim ka thaiñ kumjuh bad ki phadar, ki pastor, ki sisters, ki ophisar bad kiwei kiwei kiba la pyndep ïa ki kyrdan pule bapher bapher.
U Bah Pius Marweiñ haba ai jingkren kum u kongsan u la ong ba ki jait bynriew Lyngngam ha kane ka juk, kim dei shuh kiba dang sahdien la ka long ha kino-kino ki liang. U la ong ruh ba ha kaba ïadei ban pynneh pynsah ïa ka riti ka dustur dei ban kynmaw ruh ïa ka rukom shong kha shong man, ha kaba mynta ka rukom ïa shongkha shongman ka la kylla shongkha jaktung bad kane ka dei ka daw bah ka ban pyntroiñ ïa ka jaidbynriew.
Haba ïakren pat bad u Dr. Bostick Mawsor, President ka ALO, u la ong ki jaidbynriew Lyngngam ki dei kiba kham pher haba ïanujor bad kiwei pat kiba hapoh ka bri u hynñiewtrep namar ki don la ka jong ka riti dustur, ka rukom lehniam, ka rukom bat khyndew, ka riam tynrai bad kiwei kiwei, hynrei kaba sngew lyngngoh ka long ba ïa ki Lyngngam la ju kam trai ne kam kur da ki paralok Garo da kaba pynkynthup lang ïa ki Lyngngam hapoh ka jaidbynriew Garo, phewse ki Lyngngam ha ka jingshisha kim dei ki jaidbynriew Garo hynrei ki hap hapoh ka jaidbynriew u hynñiewtrep.
U la ong ruh ba ka don kawei ka jaidbynriew Megam jong ki paralok Garo bad na kita ki jaidbynriew la don ruh katt-katne kiba la pynkylla ne rung sha ka jaidbynriew Lyngngam bad ïa kata haba uno-uno u briew ne kiba na kiwei pat ki jaidbynriew haba ki wan, la pdiang sngewbha hynrei ym pat don pat ki jaidbynriew Lyngngam kiba la leit ïasnoh ne rung pynkylla sha ka jaidbynriew Megam. Kumta ki Lyngngam ki hap beit hapoh ka jaidbynriew u hynñiewtrep ym bad ki Garo namar u Lyngngam um lah ban kylla Megam ne Garo wat haba la don kiba na ki Megam kiba la kylla Lyngngam.
