Shillong, Nailur 15
U Bah AL Hek uba dei u MLA ka Pynthorumkhrah bad nongïalam ka BJP ha ka sngi Ba-ar u la ong ba ka jingpynlait ïa ki Jylla riewlum na ka Uniform Civil Code (UCC) ym pat lah ban ong eiei tad haduh ba ka Sorkar Pdeng kala pynmih ïa ka jingpynbna.
U Bah Hek u la pynpaw ïa kane haba jubab ïa ka jingkylli la ka Meghalaya bad kiwei ki Jylla riewlum kin lait na ka jingtreikam ka UCC.
“Bun ki ong ba ka UCC kan ym treikam ha ki Jylla riewlum, lada ka long kumta kamut kane ka mat ïakren kala kut. Hynrei haduh mynta ngam ngeit satia tad haduh ba ngan da ïohi ïa ka jingpynbna,” ong u Bah Hek.
U ong ba ïa ka jingai jingkynthoh un lah ban leh tad hadien bala bishar ïa ka jingpynbna.
“Ngin sa peit ka jingpynbna ka ong kumno. Lada ka ong ba ka UCC kan ym treikam ha ki Jylla riewlum, kan ym don eiei shuh ban ïakren?. Ban ong ba nga ngeit lane ngam ngeit, ngam lah ban ong eiei mynta. Ngin ap tad haduh ba ngin da ïoh ïa ka jingpynbna,” u la ong.
U Bah Hek u la kdew ïa ki jingpyntip ba bun rukom kiba la saphriang ha ki rynsan social media.
“Ngim tip haduh mynta la ka long kaba shisha ne em. Ha rynsan social media, ki don ar jait ki jingkynthoh-kawei ka ong u Amit Shah u la ong ba baroh 21 tylli ki Jylla ba synshar ka BJP yn pyntreikam ïa ka UCC. Kata ka dei kaba ong ha rynsan social media. Kam pat don satia ka jingpynbna ba ngin ym pyntreikam ïa ka UCC ha ki Jylla riewlum,” u la ong.
“Ngam ngeit ïano-ïano ruh tad haduh ba ngan da ïohi ïa ka jingpynbna ba pynmih ka Sorkar,” ong u Bah Hek.
