Shillong, Nailur 15
U Myntri Rangbah ka Jylla Conrad K Sangma ha ka sngi Ba-ar u la ong, ka jingpynshai jong ka Sorkar Pdeng ba ka Uniform Civil Code (UCC) kan long katkum ka jinglong ki Jylla, kala pynkylla lut ïa ka jinglong jingman jong ka jingïakren halor jong ka.
U Conrad u la pynkynmaw ïa ki nongrim jong u ba ka aiñ ba long kumjuh ha baroh kawei ka Ri ka dei ka bym lah satia ban pdiang.
“Kum ka jingmut, ka jingpyntreikam ïa ka UCC ha India ka dei kaei-kaei ka bym don jingmut ha nga. Ka i kumba kan ym long satia bad ka dei kaei-kaei kaba ngin ym lah ban pdiang,” u la ong.
U ong ba ka jinglong jingman kala pher mynta namar u Myntri kam Pohïing ka Ri u la pynpaw ba ka UCC kan long katkum ka jinglong ki Jylla.
“Lada phi khmih ïa ka UCC Meghalaya, kan dei ka UCC riewlum, bad ka rukom kan long khambun kum ka imlang sahlang ba ai pateng sha ki Kynthei. Nga la ong ba lada ki wanrah ïa ka Bill ha Parliament kaba ong ba naduh mynta baroh kin long ki jingai pateng sha ka kynthei, ngin dei ki briew kiba kmen eh ban pdiang. Kumta khlem da ïohi ïa kaei kaba don hapoh ka Bill, kan long kaba bakla ban shu kynthih sha kaba kut ka rai,” ong u Conrad.
U la ong ba kano-kano ka rai halor ka UCC ha Meghalaya yn sa shim tang hadien ka jingïa syllok ha baroh kawei ka Jylla.
“Ngi hap ban shim ïa ka jingmynjur lang u paidbah bad ngin sa ïasyllok bad ki kynhun bapher-bapher, ki seng saiñpyrthei, la ngi kwah ne em ïa ka bad lada ngi kwah, kum kaei ka aiñ ba ngin don,” u la ong.
U la bynrap ba kum ka Jylla ba bun ki riewlum bad ba khleh jaidbynriew, ka jingpyntreikam ïa ka rukom ai pateng sha ki kynthei ïa baroh ka lah ban buh jingeh ïa ki jaidbynriew bar jylla bad kumta, ïa kane ka kam donkam ban hap ban ïatai bha.
“Kam don jingma ban ïasyllok bad shim ïa ka jingai jingmut na u paidbah. Kaei kaba ngi leh, kan long beit na ka bynta ka jingmyntoi uba bun balang,” u la bynrap.
