Shillong, Nailur 15
U nongïalam ba rangbah ka BJP uba dei ruh u MLA ka Pynthorum-khrah, u Bah A.L. Hek, ha ka Sngi Ba-ar u la ong ba ka jingthmu ban pynkynriah ïa ki 342 tylli ki longïing na Harijan Colony ha Them Ïew Mawlong ka dei ban treikam tang ïa ki nongtrei Sorkar kiba dang shakri, bad ïa ka Gurudwara kaba don (hangtei) ka dei ban neh kumba ka long bad ym dei ban pynkynriah ïa ka.
Na ka liang u Bah Hek u la ong ba u la pynsngew ïa kane ka mat naduh ka por jong u Myntri Rangbah barim, u Dr. Mukul Sangma.
“Naduh kham ha-shuwa, shuwa jong ka Sorkar ba ïalam da u Conrad K. Sangma, ha ka por jong ka Sorkar u Dr. Mukul, nga la rah ïa kane ka mat. Ha ka por jong u Conrad ruh, nga la ïai bteng ban-ban ïa kajuh,” ong u Bah Hek.
U la pynkynmaw ba kum u Myntri ka Koit ka Khiah, u la tyrwa ban kynthup ïa ki nongtrei ka tnad ka koit ka khiah kiba sah ha Them Metor ha ki jaka sah jong ki tnad treikam Sorkar (Quarter).
“Kito kiba trei ha ka Sorkar – la ka long ha Municipal, ka Koit ka Khiah bad ki tnad bapher-bapher. Ha ka por ba nga dang long Myntri ka Koit ka Khiah, nga la ong aiti noh ha nga ïa baroh kito ki nongtrei kiba trei ha ka tnad ka Koit ka Khiah, ngin ai jaka sah sha baroh kito kiba don ha Them Metor. Ngi long kiba la khreh ha kito ki por bad ngi long kiba la khreh wat mynta ruh,” u la ong.
Halor ka jaka mane Blei ha katei ka jaka, u Bah Hek u la ong, “Lada ki ong ba ki kwah ban kynriah, ngim kwah ban pynkynriah ïa katei ka Gurudwara. Ka jaka mane ka dei ka jaka mane. Ngi dei ban burom ïa kawei-pa-kawei ka jingngeit. Lada u Hindu u don la ka jong ka jingngeit, ngi hap ban burom, la ki Khristan ne Muslim, ngi hap ban burom ïa baroh ki jingngeit. Kam don jingeh eiei haba ïadei bad kane.”
U Bah Hek u la ong ba ka seng ka kloi ban ïarap ïa ka Sorkar Jylla ban pynïoh jaka na ka tnad kam ïada ri na ka bynta katei ka jingthmu, hynrei ka pyrshah pat ban pynjlan ïa ka jingmyntoi sha ki bym dei ki nongtrei.
“Ngin ïarap ruh ïa ka Sorkar ban pynïoh jaka na ka tnad ïada ri. Dei ban ai jaka ban pynsah ïa ki, hynrei ka dei ban long tang ïa ki nongtrei Sorkar. Kam lah ban long ïa kito ki bym dei ki nongtrei Sorkar ban dawa ïing – ngin ym pdiang ïa kata. Lada ai jaka, ka dei ban long beit tang na ka bynta kito kiba dang don ha ka kam Sorkar,” u la bynrap.
