Shillong, Nailur 15
U President ka BJP Meghalaya State Unit u Rikman G Momin u la ong ba ka jingthmu ban rung BJP ki MLA na kiwei ki seng saiñpyrthei hapoh ka Jylla, ka jingïakren ka long beit bad ki nongïalam na Delhi namar ki nong-ïalam napoh ka Jylla kim don bynta eiei.
U la ong ba kam don kum kata ba ki nongïalam BJP na Delhi kin leh kiar ïa ki namar kane ka dei beit ka kam jong ki nongïalam na Delhi.
Shuh shuh u la ïathuh ba ka BJP mynta kam pat don por ban ïakren ïa kine ki MLA ban wan rung namar ka seng ka dang bunkam ban pyn-khreh ban rakhe ïa ka jingdap 25 snem ka jinglong nongïalam u Narendra Modi naduh ba u long u Myntri Rangbah ka Jylla ha Gujarat bad bteng ban long Myntri Rangbahduh ka ri India haduh mynta ka sngi.
U Momin u la ïathuh ba ka BJP ha Meghalaya kan pynlong ïa ka ‘Seva Sankalp Abhiyan’ kaba shibnai ban kynmaw burom ïa ka jingdap 25 snem jong u Myntri Rangbahduh ka ri u Narendra Modi ha ka kam shakri paidbah.
Haba kren sha ki lad pathai khubor, u Momin u la ong ba kane ka jingrakhe ïa ka jingïaid lynti jong u Modi kaba la sdang kum u Myntri Rangbah ka Jylla Gujarat ha u snem 2001, bad ka thmu ban pynkylla ïa ka mynsiem shakri jong u sha ki kam ba shapoh ha kylleng ka ri India.
Ka Abhiyan kan long naduh ka 17 tarik u Nailur kaba dei ka sngi kha jong u Myntri Rangbahduh haduh ka 17 tarik u Risaw 2026. Ka 7 tarik u Risaw ka long kaba kongsan namar ba ka dei kaba 25 snem ba u Modi u la shimti ïa ka kam paidbah.
U la ong ba ka seng ka la buh laiñ ïa ki prokram kiba ïadei bad ka jingshakri kiba pynleit jingmut ha ki samla, ka koit ka khiah, ka mariang bad ki nongtrei ba hakhmat eh.
Ha ka 17 tarik u Nailur, ka seng kan pynlong ïa ka jingthang bombati naduh ka por 6 baje janmiet shaneng ha kylleng ka Jylla Meghalaya, ha kaba ki nongshong shnong kin pyni ïa ka jingkitbok kitrwiang jong ki sha u Myntri Rangbahduh ka ri.
Ha ka 26 tarik u Nailur, yn pynlong ïa ki jingïakop dro dur hapdeng ki skul ha ka kyrdan district ban pynshlur ïa ki khynnah ban pyni ïa ka jingthmu jong ki na ka bynta ka ri India.
Ka seng kan ai khublei ruh ïa ki nongtrei Anganwadi bad ASHA na ka bynta ka bynta ka jingtrei shitom jong ki hynrei kaba kongsan bha ha kaba pynpoi ïa ki jingshakri ha ka koit ka khiah bad ka jingbam, khamtam eh sha ki kynthei bad ki khynnah.
Kiwei pat ki kam ki kynthup ïa ka jingaisnam bad ki prokram jong ka koit ka khiah, ki jingthung dieng bad ki jingpynkhuid bad shakri paidbah ban pynroi ïa ka jingkitkhlieh jong ki nongshong shnong.
