Shillong, Nailur 15
U National President ka NPP uba dei ruh u Myntri Rangbah ka Jylla u Conrad K Sangma u la pynskhem ba ka NPP ka long kaba ïatylli namar baroh 33 ngut ki MLA ki la trei shitom ban jop ïa ka ilekshon shiteng samoi ha Shillong Lok Sabha ban wan bad ha ka ilekshon GHADC.
“Ka NPP ka long kaba ïatylli pura namar wat u Symbud Myntri Rangbah ka Jylla u la kren na ka bynta ka NPP bad u la ai ïa ka dur kaba shai bha ba ngin ïatreilang. Ka jingdon jong ngi ka long 33 ngut; Ngi ïatylli bha bad ngi trei shitom bha, ym tang na ka bynta kane ka Sorkar, hynrei ban pynthikna ba ka seng kan nang kiew ha ki sngi ban wan,” u la ong.
U Conrad u la kyntait ruh ïa ki jingkynnoh ba don ka jingthmu ki MLA ka UDP ban rung sha ka BJP namar kane ka jingïakren ka long tang ha ki “social media”.
“Ngam shym la ïohsngew na kano-kano ka tyllong khubor kaba lah ban shaniah, nga dang ïohi tang ha ki khubor social media,” la ong u Conrad.
U la ong, “Ngam lah ban ong eiei namar ki dei tang ki khubor ba mih ha ki rynsan social media, ka dei ban long katkum ki jingshisha. Haduh ba ngan da ïohi ïa kaei-kaei kaba thikna, ngan sa ong eiei namar kan sa long kum u bom nuclear uba bthei.”
