Shillong, Ïaïong 01
Ka IIM-Shillong ka la nang pynkhlaiñ ïa ka jingïadei jong ka bad ka pyrthei haba phai sha ka jingïaid lynti ha ka pule-puthi da kaba ïasoi ïa 5 tylli ki jingïateh kular (MoU) bad ki jaka pule ba pawkhmat na Europe, Africa, bad North America.
Kine ki jingïatreilang ki pyni ïa ka sienjam kaba kongsan ha ka jingkut jingmut jong ka shlem jingpule ban kyntiew ïa ka jingïatreilang hapdeng ki ri ba nabar ha ka jingpynïaid ïa ka pule-puthi, ki kam wad bniah, bad ka jingïakylliang haba ïadei bad ka kolshor.
Kine ki jingïateh MoU ba la soi thymmai ki long bad ka POLIMI Graduate School of Management, Italy, IE Business School, Spain, Westsächsische Hochschule Zwickau – University of Applied Sciences Zwickau, Germany, University of Johannesburg, South Africa bad ka Laurentian University, Canada.
Kine ki jingïateh kin pynsuk haba ïadei bad kiba bun jait ki sienjam ban ïatreilang, ba kynthup ïa ki ‘Student and Faculty Exchange Program’, ki projek wad bniah ha ryngkat ka jingïatreilang, bad ka jingpynwandur ïa ki prokram ‘Dual-Degree’ bad ‘Immersion’.
Da kaba thaw ïa ki lad ai jinghikai ha kylleng ka pyrthei, ka IIM-Shillong ka ïai bteng ban buh ïalade kum ka jaka pdeng na ka bynta ka jingnang-jingstad, kaba pynkhreh ïa ki samla pule bad ki ‘riewshemphang da ka jingïohi pyrthei kaba shisha.
Shuh shuh ki MoU ki ïahap bad ka thong ba dang ïaid shakhmat jong ka IIM-Shillong ban tei ïa ka jingïadei kaba khlaiñ ha ka pyrthei haba phai sha ka pule-puthi, ban pyntikna ba ki samla pule bad nonghikai jong ka kin ïoh jingmyntoi na ki lad wad bniah kiba tbit tam ka pyrthei, ki jingïadei hapdeng ki kolshor bapher-bapher, bad ka jaka pule kaba ïar bad ba bun rukom.
Shuh shuh kane ka shlem pule ka la nang pynïar ïa ki jingïatreilang jong ka bad ki ri ka pyrthei – kaba pynskhem biang ïa ka jingaiti jong ka ha ka ban pynwandur bad pynjanai ïa ka pule-puthi.
