Khliehriat/Jowai Ïaïong 01
Da ka jingthmu ban kyntiew ïa ka rukom pyndonkam ïa ka um bad ban pynneh ïa ka khyndew bad ruh pynshlur ïa ka jingïashim bynta jong ki nongshong shnong ban pynneh pynsah ïa ki tyllong um, ka West Jaiñtia Hills District bad East Jaiñtia Hills District ha ka 1 tarik mynta u bnai ki la pynlong ïa ka Yatra Watershed kaba hap hapoh ka Pradhan Mantri Krishi Sinchayee Yojana (PMKSY) Watershed Development Component (WDC) 2.0.
Ha West Jaiñtia Hills District ïa kane ka prokram la pynlong ha shnong Mukhap ha ka jingdonlang u MLA ka Mowkaiaw Ma Nujorki Sungoh, u Dolloi ka Elaka Raliang Ma Chawas Lyngdoh, u Senior ASWCO Ma W Passah, nalor kiwei kiwei.
U Ma Nujorki Sungoh u la kren halor ki jingkyrkhu jong ka jylla kiba kynthup ïa ka jingitynnad jong ka mariang, ka jingriewspah ha ka kolshor nalor kiwei kiwei ki jingkyrkhu. U la ban jur ruh ïa ka jingdonkam ban pynneh pynsah ïa ka mariang.
U Ma T War, u la kren shaphang ka jingdonkam ban pyllang ïa ka um slap bad ka um hapoh khyndew bad ka jingdonkam ban ïashim bynta lang ki paidbah khnang ban ïoh ïa ka um kaba thikna.
Kum shibynta jong ka Watershed Yatra, ka ophis ka la pynlong ïa kiba bunjait ki prokram ka jingpyni ïa ka ‘Video Clip’ kaba lyngkot halor ka Watershed Yatra ban pynsngewthuh paidbah. Ka jingïaphylliew jingmut bad ka jingai khusnam sha kito kiba la noh synñiang ban pynneh pynsah ïa ki wah, kumjuh ka jingpyni ïa ka ‘skit’ halor ka jingïada ïa ki marpoh khyndew.
Ha kane ka sngi la don ruh ka jingshad kolshor da ki SHG. Nalor kata, la pynlong ruh ïa ka jingïakob Open Quiz na ka bynta ki khynnah skul bad la sam ruh ïa ka khusnam sha baroh ki nongïashim bynta.
Katba ha East Jaiñtia Hills District ïa kane ka prokram la pynlong ha shnong Lelad kaba hap hapoh ka Saipung C&RD Block, East Jaiñtia Hills District ha ka jingdonlang ka MLA jong ka Sutnga Saipung ka Kong Santa Mary Shylla, u Deputy Commissioner ka East Jaiñtia Hills District Shivansh Awasthi, ki briew napoh ka tnat Land Resources hapoh ka Ministry of Rural Development, ka Sorkar Kmie Sharmistha Panigrahy, Divisional Soil and Water Conservation Officer, East Jaiñtia Hills District, Bah F Syiemiong, ki waheh shnong, ki khynnah skul, ki kynhun SHG nalor kiwei kiwei.
Ka Kong Santa Mary Shylla ha ka jingkren kala ai khublei ïa ki nongïoh jingmyntoi na ki projek bapher bapher bad kala ban jur ruh ïa ka jingdonkam ki wah kiba don hapoh ka district khnang ban pynbiang ïa ka jingdonkam jong ki paidbah namar ka um ka long kum ka jingdonkam kaba kongsan jong ka jingim kaba man ka sngi. Kala ban jur ruh ïa ka jingdonkam ban pynneh pynsah ïa ka um bad ki khlaw ki btap bad ban pynïar ïa kum kine ki projek sha ki bynta bapher bapher jong ka district.
U Deputy Commissioner ka East Jaiñtia Hills District, u Shivansh Awasthi u la pynpaw ïa ka jingdonkam ban pynsngewthuh paidbah shaphang ki prokram bad ki skhim pynroi ïa ki wah. U la pynpaw ruh ïa ka jingdonkam ban don ka jingïatreilang hapdeng ki tnat bapher bapher. U la kren ruh halor ki skhim bapher bapher kiba long shi bynta ban weng ïa ka jingduna um.
Kiwei pat ki jingpynbyrngia ki long ka jingshad lyngkot ba la pyni da ki dkhot ka Upper Lytein Watershed bad ka jingshad kolshor da ki nongïoh jingmyntoi hapoh ka wah Tangnub Khapiaba Watershed kaba la pyni ïa ka jingriewspah jong ka kolshor jong katei ka thaiñ.
Ha kane ka prokram la buh ruh ïa ki stall kiba pyni ïa ki soh bad ki jhur ba la pynmih hi da ki dkhot ka SHG jong ka thaiñ.
Lah ban kdew ba ka Pradhan Mantri Krishi Sinchayee Yojana (PMKSY) Watershed Development Component (WDC) 2.0 ka phai khmat sha ka rukom pynneh pynsah ïa ki marpoh khyndew, ka jingpynneh pynsah ïa ka khyndew ka shyiap bad ka jingpynbha ïa ka rukom ai um ban kyntiew ïa ka jingmih ha ka rep ka riang.
