Shillong, Ïaïong 01
U Bah Process T Sawkmie, MLA barim u la pynpaw ba u Myntri Rangbah barim ka Manipur u N Biren Singh namar ba u la duh ïa ka jinglong Myntri Rangbah, i kumba u sahnud sah bad u kren pyrshah sa ïa u PA Sangma (Bam Kwai ha Dwar U Blei) ban ong ba ka jingkren jong u ha Parliament ka wanrah ïa ka jingphiah ïa ki rit paid hapoh ka Shatei Mihngi baroh kawei.
“Hynrei ka jingkwah u Late PA Sangma ka long ba ngi ki rit paid kiba don hapoh North East ban ïa long kawei,” ong u Bah Sawkmie haba kren sha u nongthoh khubor.
U la bynrap, “Ka jingkren une u Myntri Rangbah barim ka long ban pynhiar dor bad pynpaw pynban ïa ka jinglong jong u, ba wat ïa u briew u bym don shuh ha kane ka sla pyrthei u dang kren pyrshah.”
“Ki paidbah nongshong shnong ka Meghalaya baroh kawei, ngi dei ban pynrem ïa ka jingkren jong u, namar ïa u Late PA Sangma la ñiew burom da ka ri India baroh kawei, khamtam ma ngi ki nongshong shnong ka Meghalaya,” u la ong bad bynrap “Namar ma ngi ki nongshong shnong ka Meghalaya ngin nym klet ïa ki matti jong une u rangbah uba la trei ïa ka jylla baroh kawei.”
