Nongstoiñ, Ïaïong 01
Ka jingbun jong ki kulai kiba khlem trai kiba don ha ki bynta bapher bapher jong ka pyntha kba Umyiap lane ka madan Umyiap, kawei na ki jaka rep ka la pynlong ïa kiba bun ki jingthung-jingtep ba kin jot bad julor noh.
Ïa kane la pyntikna ruh da ka HFU Umyiap Circle lyngba u Vice President, Bah Densil Nongsiej, ha kaba u la pynpaw ruh ba kum ka seng ka dap da ka jingsngewkhia kaba jur halor kane ka jinglong jingman bad ka jingduhnong jong ki nongrep.
U Bah Nongsiej u la ong ruh ba katei ka jingnang bun ki kulai kiba khlem trai ha madan Umyiap, Nongstoiñ ha West Khasi Hills District, ki la pynjot naphang ïa ki jingthung-jingtep naduh kum ki kajor, motor bad kiwei pat.
Kumta, na ka liang jong utei u nongïalam u la kyrpad sha baroh ki trai ba kin wan shim noh bad ban sumar noh ïa kitei ki kulai namar ka la dei ka por ban sumar namar lada ïai pynslem kin sa nang pynjot shuh shuh bad ki trai jong kitei ki kulai kin hap ban pyrkhat ïa ki nongrep kiba la trei shitom.
Shuh shuh u la ïathuh ruh ba kitei ki mrad ki la pynjot ïa ki jingthung-jingtep jong ki nongrep kum na ka shnong Mawkynbat, Mawsnapwir, Lumpyngad, Nongdiwah, Nongrangoi bad baroh ka thaiñ.
