Nongpoh, Ïaïong 01
Ka All Meghalaya Karbi Association (AMKA) kaba dei ka seng kaba peit ïa ka bha ka miat jong ki jaidbynriew Karbi kiba shong ba sah ha ka jylla Meghalaya, ha ka Sngi Ba-ar ka la ïoh ban plie paidbah bad sdang ïa ka jingrakhe Jubili Ksiar kaba lai sngi lynter kaba la pynlong ha Purduwa Kharpati.
Kum ban shu kdew hangne, ïa ka AMKA la seng nyngkong ha u snem 1975 hapoh ka kyrteng Ri Bhoi Karbi Social Welfare Association (RKSWA) bad dei ha u snem 1985 la pynkylla noh sha ka kyrteng AMKA lyngba ka jingmynjur jong ki nongïalam, ki dkhot bad ki paidbah Karbi ka jylla.
U Bah Mayralborn Syiem, MLA ka Nongpoh u la wan ban shim bynta ha kane ka jingplie ïa ka jingrakhe kum u kongsan da kaba kyntiew ïa ka lama jong ka AMKA bad ruh ban pyllait paidbah ïa ka kot sah kynmaw (souvenir) jong ka AMKA.
Ha kane ka sngi, la ïadon ryngkat ruh da ki nongïalam ba hakhmat jong ka AMKA ba kynthup ïa u OL Terang kum Chief Adviser, u HS Engleng kum Adviser, u Robert Jone Ronghang kum President, u Bistokan Timung kum Secretary nalor kiwei kiwei.
Haba ai jingkren ha kane ka sngi, u Bah Mayralborn Syiem u la ai ka jingkhublei kaba kyrpang sha ki nongïalam jong ka AMKA kiba la ïadon bynta naduh ba la seng tad haduh kine ki sngi kiba mynta bad pynpaw ba kum ki nongïalam bunsien ki ju mad ki jingeh, hynrei u la pynpaw pat ïa ka jingkmen ba ki nongïalam jong kane ka seng kiba long ki briew kiba trei shitom bad kiba la lah ban pynïaid ïa kane ka seng haduh kumba ka long mynta.
U la ong ruh ba ki paralok Karbi kiba don ha Meghalaya ki dei ki trai shnong bad kim dei satia ban pyrkhat da kumwei, hynrei ki dei ki trai shnong kiba la im la heh bad la san bad ïa long kawei naduh mynnor haduh mynta bad ruh wat ha ki por ki ban dang wan.
Nalor kata, u la kular ruh ba kum u MLA uba ki la pynjop, un ïai dong ryngkat bad ka AMKA, bad ki shnong ki thaw bapher bapher halor ki jingdonkam ban kyntiew ïa ka roi ka par jong ki shnong ki thaw, ki riti ki dustur, ka khyndew ka shyiap bad kiwei kiwei.
Kumba na ka liang jong ka Khasi Hills Autonomous District Council (KHADC) ka la dep ban pynlong aiñ ïa ka aiñ bat khyndew ne kata ka Land Act, na ka liang u jong Bah Mayralborn Syiem u la kyntu ïa ki nongïalam Raid bad nongïalam shnong, khamtam kito kiba sah sha ki thaiñ khappud ba kin wan shakhmat ban pynbiang ïa la ki kot ki sla jaka naba ki muhor (seal) jong ki, ki dei kiba la ithuh da ka aiñ naduh ba la pyntreikam ïa ka Land Act jong ka KHADC.
