Shillong, Ïaïong 01
Kawei ka longkmie Khasi kaba la shah kynnoh ha ka seng Ri War Development Organisation (RWDO) ba ka dei na ka shnong Rana kaba ïoh lok da u bar jylla ka la pynshai ba kam dei ka nongshong shnong jong ka Rana kaba don sharum Pynursla, East Khasi Hills District hynrei ka shu sah wai ha katei ka shnong bad mynta ka khlem sah shuh namar ka la sah noh sha shnong lajong.
Kum ban shu pynkynmaw ka seng Riwar Development Organisation (RWDO) Nongjri Circle ha ka 18 tarik u Lber 2025 ka la beh noh ïa ki bar jylla ba pyntrei ïa ka skul Ramakrishna Mission ha Rana namar ba kim don ïa ki kot ki sla kiba biang. Ha katei ka sngi u Bah Lovingson, President ka RWDO Nongjri Circle, u la ïathuh ba u don uwei u bar jylla uba ïoh lok hapoh ka shnong Rana ha kaba u la pynrem jur ïa katei ka longkmie bad u la kyrpad ïa u CEM bad u EM ka Trade hapoh KHADC ban pyrkhing ïa ka jingai trading license ïa ki bar jylla.
