Shillong, Ïaïong 01
Ki runar bym lah ban ithuh ki la thang ïa kawei ka arshaka bad ruh ban pynjulor ïa ka dukan ha ki bynta jong ka GS Road, Shillong.
Katkum ka khubor kaba la ïoh na ki pulit la ong ba u Shardul Kumar u la ai ka jingujor ba ki runar bym lah ban ithuh ki la thang ïa ka arshaka ka jong u, kaba don ïa u registration number ‘ ML05-L-3154 hajan ka dukan Bijoya Shop ha GS Road, Shillong bad ha kajuh ka por ban pynjulor ruh ïa kane ka dukan bad ban phet krad pat hadien ba la dep leh ïa kine ki kam.
Ha kawei pat ka khubor, u Fernando Riahtam u la ai ka jingujor ba ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-Z-9005 najan jong ka 2nd Ground Polo, Shillong.
Ha kawei pat ka khubor, ki pulit ki la pyntip ba ha ka 30 tarik mynshem bnai, kata ha ka por kumba 8.30 mynmiet, lai ngut ki runar ki bym lah ban ithuh, ki la pyrshang ban tuh ha ki bynta jong ka Anjali Parking Lot, Shillong. La ong ba kham hadien, kine ki runar ki la shoh ruh ïa uwei u samla uba dang 21 snem ka rta, hadien ba u la wan ban tuklar ïa kane ka kam tuh ka jong ki. Une u samla ha kane ka jingshah shoh, u la mynsaw malu-mala.
