Shillong, Ïaïong 01
Ki Nongïalam jong ka Hynñiewtrep Integrated Territorial Organisation (HITO) ki la pyntip ba na ka liang jong ka Khasi Hills Autonomous District Council (KHADC) kan pynïaid hi noh ïa ka khyrdop ka tnat Khlaw naduh kaba sdang jong u bnai Ïaïong, 2025.
Ïa kane, ki Nongïalam ka HITO ki la pyntip sha ki lad pathai khubor hadien ka jingwan ïakynduh ïa u Chief Executive Member ka KHADC u Bah Shemborlang Rynjah bad kumjuh ïa u EM Bah Winston Tony Lyngdoh ban ujor pyrshah ïa ki briew kiba donkti ha ka ban lum pisa beaiñ ha ka kyrteng jong ka Council.
Lah ban pynpaw ba tang hadien shi sngi thik kata ha ka step jong ka 31 tarik u Lber, 2025 ba na ka liang ka Hynñiewtrep Integrated Territorial Organisation (HITO) Mawryngkneng Circle, ka la leit sha ka khyrdop talasi jong ka tnat Khlaw ka KHADC kaba don ha Puriang ban jurip dalade ïa ka jingdon ka jingkhrong pisa be-aiñ na ki kali ki bym dei ban lum khajna da ka District Council. Kumta halor kane ka HITO Mawryngkneng Circle bad ka HITO Sengkmie ha ka 1 tarik u Ïaïong, 2025, ka la leit ban ïakynduh ïa u EM ba dei khmih ïa ka khaïi-ka pateng bad CEM ban ujor halor kane.
Kum ban shu kdew hangne, na ka liang ka seng ha ka jingleit jurip ha katei ka sngi, ka la lap ba ka don kawei ka kali Pickup kaba kit rnga kaba la kynnoh ba ka la shah pan haduh T.5 hajar na ki briew kiba ap shabar jong ka khyrdop talasi ka tnat Khlaw. Nalor kata, ka seng ka la lap ruh ba u ophisar jong ka tnat Khlaw um don satia bad kitei ki nongtrei ruh kim don ha ka jingphong ïa ki ‘uniform’ hynrei khlem jingsalia ki la dawa bad pan beit haduh T.5000 na katei ka kali Pickup.
Na ka liang ka seng haba pyrshang ban ïakren bad kitei ki briew kiba donkti ha ka ban khrong pisa beaiñ kiba la pyndonkam da ka Maruti rong ïong ban khrong pisa na ki kali, ki la kyntait ban pyntip ïa ka kyrteng jong u nongshim wai ïa katei ka khyrdop talasi bad ki la ong pynban ba kitei ki kali ki dei ki kali kiba kit beaiñ ïa ki mar.
Ha katei ka jingïakren, ka la mih ruh ka jingïania kaba jur bha hapdeng uwei u briew uba la kam ïalade kum u nongtrei jong ka khyrdop talasi bad u President ka HITO Mawryngkneng Circle.
Haba kren sha ki lad pathai khubor, u President ka HITO Sengkmie, Bah Donbok Dkhar u la ong, u CEM bad ka Council ki la pynkut noh mardor ïa ka jingai ‘lease’ ne ai wai sha ki riewshimet ïa katei ka khyrdop talasi jong ka tnat Khlaw bad yn shimti noh ban pynïaid hi da ka Council naduh ka 1 tarik u Ïaïong.
“Na ka liang u CEM u la ai ka jingpynshai ba hadien kato ka jingjia, ki la pynkut noh ïa ka ‘lease’ lane ai wai sha ki riewshimet ka ban treikam naduh mynta ka sngi bad tang ïa ka tnat Khlaw ïa kaba yn shimti noh bad khmih hi noh da ka District Council”, ong u Bah Donbok.
U Bah Donbok u la ong ba kitei ki briew kiba donkti ha ka ban khrong pisa beaiñ ruh ki dei ki briew kiba shim wai bad kim dei satia ki nongtrei jong ka District Council.
“Hynrei ngi la ong ruh ba lada jia ba ki nongtrei ki donkti lang hangto, ki dei ban shah pynshitom”, ong u Bah Donbok.
Shuh-shuh, u Bah Donbok u la ong ba na ka liang ka District Council kan sa leh da kaba tyngeh ïa kitei ki briew kiba donkti ha ka ban khrong pisa beaiñ na ki riew paidbah bad ong ba na ka liang ka seng ruh kan sa dang ïai peitngor bha ïa kum kine ki kam ïoh lehse, ki dang don sa kiwei pat ki ‘langïong na kiwei ki tnat kiba leh ïa kum kine ki jait kam.
U Bah Donbok u la ai ka jingïaroh ruh ïa u CEM ka District Council u ba la shimti mardor ban pynduh ïa baroh ki ‘lease’ jong ka tnat khlaw kiba don hapoh u pud-u sam ka jingkhmih ka Council.
