Khliehriat, Ïaïong 02
Wat hadien ba ka East Jaiñtia Hills District ka la ïakhih paidbah halor ka jingjyllei ki karkhana Coke ne ki karkhana saiñ rnga dewïong, pynban kawei ka karkhana saiñ rnga dew-ïong ka la ïoh jingbit ne NO Objection Certificate na ka Meghalaya State Pollution Control Board ban pynïeng ïa ka karkhana ha Wapungskur.
Kane ka la paw pyrthei hadien ba ka bor shnong Wapungskur bad ki dkhot shnong ha ka jingïalam u Waheh Shnong Ma Postling Dkhar, ha ka 2 tarik Ïaïong ki la hiar jurip ïa kane ka jaka bad ki la kam ba kane ka jaka ka hap hapoh u pud u sam ka Wapungskur.
Katkum ka jingbit ne NOC ban shna ïa ka karkhana- kaba la tip kum ka Consent to Established la ai sha kawei ka kompeni – ka Om Om Coke ban pynmih ïa u rnga dewïong – LAM Coke Manufacturing Unit ban pynmih ïa u rnga dewïong haduh 24 hajar metric ton shi snem ha ka jinglut kaba T.4.50 klur.
Na ka liang u Waheh Shnong Wapungskur, Ma Postling Dkhar u la ïathuh ba ïa ka NOC la ai da ka dorbar shnong Mookhep bad ka kyrteng ka jaka ka dei Thlukure Wahtongtiang.
U la ong ba u Waheh Shnong Mookhep u tip bha ba kane ka jaka ka hap hapoh u pud u sam ka Wapungskur kumjuh u Dolloi. U la buh jingkylli kumno ki ai ïa ka NOC khlem ka jingpynsngew paidbah bad ka jaka ka long kaba jan bha bad ki nongshong shnong.
U la pynpaw ka jingpyrshah kaba jur ïa u Dolloi; bad u tip bha ba ka Wapungskur bad Mookhep ki don marjan, hynrei ïa kane ka kam la shu leh khlem ka jingtip ka shnong.
