Shillong, Ïaïong 02
Ki Rangbah Shnong na ki lai tylli ki shnong ki la lum ïa ka jingïalang bad ki bor ba dei khmih ban pynbeit ïa ka rukom ïaid kali naduh Lad Umsaw shaduh Mawsiatkhnam.
Kine ki Rangbah Shnong ba kynthup jong ka Nongkohlew, Mawsiatkhnam, bad Mawtawar, ki la lum ïa ka jingïalang bad ki ophisar ka tnad PWD, ophisar na Mawlai Block bad pulit pynïaid kali.
Ka jingthmu jong ka jingïalang ka long ban pynbeit ïa ka rukom ai ‘No Entry’ bad ‘Entry’ ha kaba ïadei bad ka surok na Lad Umsaw shaduh Mawsiatkhnam namarba ka dang don hapdeng ka jingshna.
Ha kane ka jing-ïalang, la rai ban plie naduh 5 baje mynstep haduh 9:30 mynstep, kata ka por leit skul ki khynnah, bad yn khang ne ym shah ïaid kali naduh 9:30 mynstep haduh 3:30 mynsngi.
Ha kajuh ka por, yn plie biang ha ka por wai skul ki khynnah, kata naduh ka por 3:30 mynsngi haduh 4:30 janmiet bad yn khang biang naduh ka por 4:30 janmiet haduh ynda sangeh trei mynmiet.
U Rangbah Shnong ka Mawsiatkhnam u la kyrpad ïa ki paidbah nongshong shnong kiba shnong ha kitei ki thaiñ ban ïaishah shipor katba dang shna ïa kane ka surok khnang ban suk ki nongshong shnong hadien-habud.
