Shillong, Ïaïong 02
Ka Jaiñtia Students’ Union (JSU) ha ka 2 tarik u Ïaïong, 2025 ka la leit ban ïakynduh ïa u Symbud Myntri Rangbah ka Jylla, Bah Sniawbhalang Dhar ban pynsngew haba ïadei bad ka jingdonkam ban buh noh ïa ka jaka thoh eksamin jong ka Meghalaya Public Service Commission (MPSC) ha Rilum Jaiñtia.
Ha ka jingïakren bad ki lad pathai khubor hadien ka jingwan ïakynduh ïa u Symbud Myntri Rangbah, u General Secretary ka JSU Sengkmie, Bah Neilkee Mukhim u la ïathuh ba ka jingïakren bad u Symbud Myntri Rangbah ka Jylla ka long kaba seisoh.
U Bah Neilkee u la pynpaw ïa ki jingeh ba kum ki samla pule na Rilum Jaiñtia ki ïakynduh namar ka jingbym don ka jaka thoh eksamin MPSC ha kane ka thaiñ bad u la ong ba ki khynnah kiba thoh eksamin kiba wan na ki jaka ba kham jngai kata na East bad West Jaiñtia Hills ki hap ban leit shaduh sha nongbah Shillong na ka bynta ban leh ïa ki eksamin. Kane ka la wanrah ïa ka jingeh kaba khraw bha ha kaba ïadei bad ka jingbym lah ban poi biang por ha ka jaka thoh eksamin namar ka jingdon ka jingdheng kali.
U la pynpaw ba kiba bun ki samla pule ha Rilum Jaiñtia Hills ki wan na ki longïing baduk, kumta ka don ka jingeh kaba khraw bha ha kaba ïadei bad ka jinglut-jingsep ha ka leit-ka wan sha Shillong, ka bam bad ka jaka sah.
U Bah Neilkee u la pynpaw ba u Symbud Myntri Rangbah u la pynthikna ba un sa rah ïa kane ka mat sha u Myntri Rangbah ka Jylla da kaba pynpaw ruh ïa ka jingkyrmen ba shen yn sa lah ban poi sha ka jingpynbeit halor kane ka bynta.
“Na ka liang u Myntri, u la kular ïa ngi ba un sa leit ban ïakynduh bad u Myntri Rangbah ka Jylla ban ïakren na ka bynta kane”, ong u Bah Neilkee.
Shuh-shuh, u Bah Neilkee u la ong ba lada na ka liang ka Sorkar Jylla kam shimkhia haba ïadei bad kane ka jingdawa ban buh noh ïa ka jaka thoh eksamin ha Rilum Jaiñtia, na ka liang ka Seng kan sa hap ban shim noh da kiwei pat ki sienjam.
“Lada ka Sorkar kam ai jubab ïa kane ka jingbhah ïa ka jaka thoh eksamin MPSC kumba ka la jubab ïa ka Tura bad ïa ka Shillong, na ka liang jong ngi ka JSU ngi hap ban jam noh sha kawei ka lynti na ka bynta kane ka mat”, bynrap u Bah Neilkee.
