Shillong, Ïaïong 02
U Nongïalam ka BJP bad Myntri Sorkar Bah A.L. Hek u la pynpaw ka jingbym sngew ïahap ïa ka jingkynthoh pyrshah u Myntri Rangbah barim ka Manipur, N Biren Singh ïa u Purno A Sangma ( ba la khlad). U la ong ba kam don satia kano-kano ka jingleh bakla ban dawa pynkha ïa ki Jylla kiba rit.
U Biren Singh u la kynthoh hapoh ka rynsan social media ‘X’ jong u dang shen pyrshah ïa ka jingkren u Purno kaba la kham slem, uba la ïasaid ba kan bha ban ai Jylla la ka jong ïa ki riewlum kiba don ha ka thaiñ Shatei Lam Mihngi.
Haba kren bad ki lad pathai khubor ha ka Sngi Balang, u Bah Hek u la buh jingkylli, hato ka long kaba bakla ban dawa Jylla ïa ki Khasi, Jaiñtia ne Garo, bad bynrap ba kam don eiei kaba bakla ban dawa jylla mano-mano ruh.
“Ki Garo ki kwah ïa ka Garoland bad ki Khasi ki kwah ïa ka Khasiland, hangno don ka jingbakla ban pan ïa ki Jylla kiba rit. Hato ka don ka jingleh bakla ban pan ïa ki Jylla barit? Kam don jingeh haei-haei ruh”, u la ong.
Ha kajuh ka por, u MLA ka BJP u la kyntait ban kynthoh eiei halor ka thma ktien kaba la mih hapdeng u Myntri Rangbah barim ka Manipur, N Biren Singh bad u Myntri Rangbah ka Meghalaya, Conrad K Sangma hadien ba u Biren Singh u la kynthoh pyrshah ïa u PA Sangma ha social media.
U Biren Singh haba kynnoh ïa u Myntri Rangbah ka Meghalaya, Conrad K Sangma ba u leit tuklar ïa ki kam pohïing ka Manipur, u la thoh ha social media da kaba ong, “U (L) P.A Sangma shisien ka por uba ai ksai ban phiah ïa ka NE sha ki Jylla barit ha ka jingdon ki Jaidbynriew, ka jingthmu kaba buh jingma ïa ka jinglong kawei jong ka Ri. Mynta ngi la ïohi ïa kajuh ka jingpyrshang ban tuklar ïa ki kam pohïing ka Manipur ban pynïapait pynïapra ïa ka Jylla”.
Haba kylli, u Bah Hek u la ong ba um don eiei halor ka jingïa pyni nia jong u Biren Singh bad u Conrad Sangma.
“Nga don hangne tang na ka bynta ka bha ka miat ki paidbah bad ka Jylla Meghalaya”, u la ong.
U la ong shuh-shuh ba ka jingïakynad kam dei satia hapdeng ka BJP bad ka NPP.
“Kane kam dei hapdeng ka NPP bad BJP, Ngam ïohi eiei ba kan dei hapdeng ka BJP bad ka NPP, ngam ïohi eiei kaba kum kata bad ngam don eiei ban kren halor ka jingïania u A bad u B, uwei u briew bad uwei pat u briew”, la ong u Bah Hek.
