Khliehriat, Ïaïong 02
Shi bynta ka Save Jaiñtia Mission, ka Jaiñtia National Council (JNC) ha ka 2 tarik Ïaïong ka la hiar sha ka karkhana dewbilat jong ka Amrit Cement ban khynra labour license bad trading license jong ki nongtrei bar jylla.
Ha kane ka jingleit khynra la ïalam khmat da u Ency Shadap, Chairman ka Employment Commission JNC bad Mebanteilang Sukhlaiñ Secretary ka Commission ryngkat ka jingïasynran lang ki nongïalam ka CEC.
Ka JNC ka la kam ba ha kane ka jingkhynra ka la lap ba da ki phew ngut ki nongtrei bar jylla ki bym don ïa ki kot ki sla kiba biang bad kumta ka JNC da kawei ka sur ka la beh ïa ki mardor bad maham ruh ïa ki kompeni ba kim dei satia ban wanlam briew nabar khlem ki kot ki sla kiba biang.
La maham ruh ba ïa ki kompeni ba kim dei ban thung ïa ki nongtrei katba ki trai ri trai muluk ki dang lah ban trei.
Kane ka jingkhynra ka seng ka long shi bynta ban dawa pyntreikam noh ïa ka mat kaba ka seng ka la buh hapoh ka Save Jaiñtia Mission kata ban shna noh da ki polisi kiba thymmai halor ka thungkam thungjam khamtam ha ki kyrdan kiba ki briew trai ri trai muluk ki dang lah ban trei.
