Shillong, Ïaïong 02
Ka Synjuk Ki Nongñiah Taxi Sor bad Khapsor ka la leit ban ïakynduh ïa u Executive Member (EM) ka KHADC, Bah Winston Tony Lyngdoh uba dei peit ïa ka tnat Labour bad Trade ban buddien ha kaba ïadei bad ka jingwan rung kyrthep ki bar jylla hapoh kane ka jylla, ban kamai taksi khlem ki kot ki sla kiba biang.
Ha ka jingïakren bad ki lad pathai khubor ha phyllaw ka KHADC, u Bah Shimladlang Rynjah uba dei u Working President u la ong, kane ka jingwan ki briew ba nabar jylla ban wan kamai beaiñ, ka la ktah shibun ïa ki paradoh parasnam kum ha kane ka pyrthei kyrduh kam ha kaba la shah knieh noh ïa ka pliang ja da kitei ki briew.
U la pynkynmaw ba na ka liang ka Council ryngkat bad ka jingsynran ki dkhot jong ka seng ha ka 25 tarik u Nailur 2024, la ïoh ban khynra “labour license” ha katei ka sngi ha ki thaiñ Rynjah, Laitumkhrah bad Nongmensong ha kaba la ïoh bat kumba shispah tam ki taksi ïa kiba la ñiah da ki bar jylla kiba khlem don ki kot ki sla kiba biang.
U la pynpaw ka jingsngew lyngngoh pat ïa ka seng ka dei haba buddien biang la lap ba kitei kijuh ki nongñiah kiba shah bat ha ka jingkhynra tang hapoh ar sngi ki la ïaid kamai sahuh biang ha surok.
U la ïathuh ba hadien shi bnai ba la dep khynra, ki nongïalam jong ka seng ki la leit ban ïakynduh biang ïa u EM barim ba dei peit ïa ka tnat Labour jong ka council, la shem pynban ba na ka liang jong u, um pat ïoh ka kaiphod namar ki enforcement ki khlem pat ai ïa ka kaiphod, kane ka la pyndiaw ïa ki nongïalam.
Kumta ka seng ka kyrmen ba kane ka Executive Committee ba thymmai kan shimkhia ïa kane ka kam khnang ba ki paidbah ka jylla kin ym kyrduh kam kyrduh jam.
Shuh shuh u la pynpaw ba lada ailad ïa ki nongñiah bar jylla ban wan kamai taksi khlem ki kot ki sla, nyngkong un wan shwa marwei hadien un wan ïalam ïa ki pyrsa bad hadien un wan ïalam sa ïa ki khun ki kti kaba buh jingma ïa ka jaidbynriew.
U Bah Shimladlang u la pyntip ba lada sniew ka kali jong ki Khasi, ka shim por haduh ar bnai hynrei lada sniew ka kali jong ki bar jylla tang saw sngi ki la ïoh ban kamai biang.
