Nongstoiñ, Ïaïong 02
Hadien ka jingïoh jingtip halor ka jingdon jong ki ‘riew shim kabu kiba ju mlien ban pynïap pathar ïa ki doh um ha shilynter ka wah Tyrsung kumjuh ka jingsiat pathar ïa ki mrad, pom pathar ïa ki dieng ki siej bad thang dusmon ïa ki khlaw, ka Nonglang Pungsier Anglers Association (NPAA) kan pynlong ïa ka jingïalang ban ïa pyrkhat kumno ban nang pynkhlaiñ shuh shuh ïa ka jingtrei kam ha ka 5 tarik mynta u bnai ha ka por 6.30 janmiet ha ka shnong Nonglang ha West Khasi Hills.
U Bah RL Nonglait, Secretary ka NPAA bad u Bah Usefulson Wanñiang, Secretary ka Joint Committee jong ar tylli ki seng trai khyndew Nonglang bad Nongstong ki la ong ba ka NPAA naduh ba la seng ka la ïaleh katba lah ban pahara ïa katei ka wah, naba ki ‘riew shim kabu ki la ïoh lad biang ban pynïap pathar ïa ki doh um kum ha ki sngi ba don ki kam hapoh shnong, kum ki kam ïap briew, ïathoh shongkurim bad kiwei kiwei ha kaba ki dkhot ka seng kim leit sha katei ka wah.
Shuh shuh ki nongïalam ki la kyntu ruh ïa baroh ki dkhot kiba don ha shnong Nonglang, Umwahlang, Mawsyrpad bad Tynrongmawsaw ba kin sngewbha ban shimkhia ïa ka kam bad ban poi ha katei ka janmiet ha ka por ba la buh.
Ki la ong ruh ba ka jingthmu ban pynlong ïa katei ka jingïalang ka long ruh na ka bynta ba pynkhlaiñ shuh shuh ïa ka jingtrei kam ha ka ban ïada ïa ka jingpynïap pathar ïa ki doh wah ha shi lynter katei ka wah Tyrsung bad ki shnat jong ka.
Lah ban kdew hangne ba ïa ka NPAA la seng naduh u snem 2005-06. Ha kine ki snem ka NPAA ka la ïoh ruh ïa ka jingkyrshan ba pura na ar tylli ki seng khyndew kiba don ha baroh arliang jong ka wah Tyrsung kata na ki sawphew tylli ki longïing kiba dei ki trai jong ka khyndew Nongstong bad sanphew phra tylli ki longïing kiba dei ki trai jong ka khyndew Nonglang.
