Nongpoh, Ïaïong 02
U Deputy Commissioner (Supply) jong ka Ri-Bhoi District ha ka kyrwoh ba la pyllait paidbah, u la pyntip ba baroh ki nongtrei Sorkar ba kynthup ruh ïa ki nonghikai skul Adhoc bad Deficit kiba don ïa ka Ration Card NFSA, ki dei ban aiti bad pynphai noh ïa ki Card rashon (AAY/PHH) sha ka shlem treikam u Deputy Commissioner (Supply) ka Ri Bhoi District ha lane shwa ka 30 tarik mynta u bnai Ïaïong, 2025.
Ka kyrwoh khubor ka la ïathuh ruh ba kumba ïa ka Ration Card NFSA la sam sha ki nongïoh bynta naduh 14 snem mynshwa, kata katkum ka Socio Economic Census 2011 bad pyntip ruh ba ki la don bun na kitei kiba don card rashon kiba ïoh kam Sorkar haduh kine ki sngi kiba mynta.
La pyntip ba katkum ki kyndon, ki nongtrei Sorkar kim hap satia ban ïoh bynta ban bat ïa ka Card rashon. Kumta baroh ki nongtrei Sorkar lem bad ki nonghikai Deficit/Adhoc ki dei ban pynphai noh ïa ki card rashon shwa katei ka tarik kaba la buh khnang ba ki longïing ba duk ba kyrduh kiba dei hok ban ïoh kin ïoh ïa la ka bhah ka jong ki.
Ha kajuh ka por, na ka liang ka shlem treikam ka la pynkhreh ruh ïa ka thup jong ki nongtrei Sorkar kiba bat ïa ka card rashon ba yn pynshitom ïa ki katkum ki kyndon jong ka aiñ lada kim lah ban wan pynphai ne aiti ïa kitei ki card rashon hapoh katei ka tarik kaba la buh.
