Shillong, Ïaïong 02
Ka phlim thymmai jong u Bah Pradip Kurbah kaba la ai kyrteng ‘Ha Lyngkha Bneng’ (The Elysian Field) ka la shah jied sha ka rynsan pyni phlim baheh duh jong ka pyrthei, ka 47th Moscow International Film Festival 2025. Kane ka phlim kan don ruh ha ka thup jong ka jingïakop ban ïoh ïa ka khusnam bakynsai na ki phlim jong ka pyrthei ha kane ka International Film Festival ka ban long ha Moscow, Russia naduh ka 17 tarik haduh ka 24 tarik u Ïaïong 2025.
Lah ban kdew ba ka jingïaid lynti jong ka jingpynmih ïa kane ka phlim ‘Ha Lyngkha Bneng’ ka la long naduh u snem 2020 ha kaba ïa ka khana ne ka script la pdiang da ka Asian Project Market jong ka Busan, South Korea bad ka Co-Production Market ha ka Film Bazaar ba la pynlong da ka National Film Development Corporation (NFDC).
Ka jingshna ïa kane phlim ka la bam por haduh 2 snem namar ba hap ban ring dur ïa ka halor ki jingïaid ki saw aïom jong ka mei mariang bad la ring dur ruh ïa kane ka phlim ha kylleng ki bynta jong ka Sohra ban pyni ïa ka jingitynnad jong ka mei mariang bad ka jingriewspah jong ka lariti.
Ïa kane ka phlim la pynmih da ka Kurbah Films ha ryngkat ka jingkyrshan na ka Hello Meghalaya, ka Pomus New Horizon, ka Knup Creative bad ka Cat N Mouse Entertainment bad ki tyngshop ki puron kiba ïadon bynta ha kane ka phlim ki kynthup ïa u Bah Richard Kharpuri, Helena Duiia, Baia Marbaniang, Albert Mawrie, Merlvin Mukhim bad u Jeetesh Sharma.
Lah ban kdew ba u Bah Pradip Kurbah u dei uwei na ki nongshna phlim ba pawnam jong ka Jylla bad u la ïoh rah ruh ïa bun ki khusnam halor ki kam shna phlim jong u, kiba kynthup ïa lai tylli ki National Films Awards ha u snem 2014, 2016 bad 2019 bad u la ïoh ruh ïa ka khusnam ba heh jong ka pyrthei kaba la tip kum ka Kim Jiseok Award ha u snem 2019.
