Shillong, Ïaïong 02
Ka Hynñiewtrep Border Dispute Redressal Forum (HBDRF) ha ka 2 tarik u Ïaïong, 2025 ka la leit ban buh da ka jingthoh sha u Myntri Rangbah ka Jylla, Conrad K Sangma ban dawa pynlong da ka jingïalang hapdeng ka Sorkar bad kane ka kynhun ban ïakren bad ïamir ha kaba ïadei bad ka jingïapynbeit pud na ka bynta ka Block-1 bad Block-2 kiba dei ki jaka kiba hap ha ka jingïakajia pud hapdeng ka Jylla Assam bad Meghalaya.
Haba kren sha ki lad pathai khubor hadien ka jingwan aiti ïa ka shithi sha u Myntri Rangbah ka Jylla, u Chairman ka Forum, Bah Chandame Sungoh, u la ong ba kam don jingmut ïa ka Sorkar ban pynmih ïa ka jingïakren haba ïadei bad ka Psiar Sector bad ka Khanduli Sector hynrei kaba kongsan ban ïakren ka dei ïa ka Block-1 namar lada ka Block-1 ka wan shapoh ka Jylla Meghalaya, khlem jingartatien ka Psiar Sector bad ka Khanduli Sector ruh kin wan shapoh ka Jylla Meghalaya.
“Kane ka Khanduli bad ka Psiar Sector ka mih tang na ka daw ka jingtlot jong ka Sorkar Meghalaya bad ka jingbym nang jong ngi ban bat ïa la u jong u pud-u sam. Kam donkam hi ruh namarba lada wan ka Block-1, kine ki la wan lypa hi hynrei kaba donkam eh ka long ka Block-1 bad lada ngi pynleit jingmut than ïa ka Khanduli bad ka Psiar Sector ïoh ngin duh noh ïa ka Block-1”, ong u Bah Chandame.
U la ong ba ha ka jingïoh jingtip jong ka Forum kam pat don satia kano-kano ka jingwan jurip da ka Regional Committee pynbeit pud ka West Jaiñtia Hills District jong ka Sorkar Jylla bad ong ba ki paidbah kin nym pdiang da lei-lei ïa kane ka sienjam pynbeit pud ïa ka Block-1 lada ka Regional Committee kam hiar dalade sha madan ban pynshai bad ki paidbah.
“Lada ngi peit pat sha ka Block-1 Langpih, ki Chairman jong ka Regional Committee ki la leit dalade ban hiar bad ban ïakren shatei. Ka por ba ka Sorkar ka la buh ban aiti ïa ka kaiphod ka la kut bad ngim tip la ki la dep ban aiti ne kim pat dep hynrei lada ki la dep ban aiti, ka don jingma namarba ngim pat ïohi ïa kata ka jinghiar ban jurip ïa ki jaka ha ka rukom kaba dei”, ong u Bah Chandame.
Shuh-shuh, u Bah Chandame u la ong ba lada ka Sorkar kam lah ban leh eiei halor ka jingkhot ïakren ïa ka Forum, na ka liang ki paidbah kin banse ban mih ban pynlong noh da ka jingïakhih.
Na ka liang u Nongaiktien ka Forum, Bah Thomas Passah u la ong ba ka jingwan buh jingthoh ka Forum haba ïadei bad ka jingsngewkhia halor ka jingpynbeit pud na ka bynta ka Block-1 ka dei kaba la leh da ki katno sien shuh hynrei na ka liang ka Sorkar kam don satia ïa kata ka rukom treikam kaba tbit ban ai ïa ka jubab.
U la ong ba kaba sngewsih ka long ba ki 36 ngut ki nongmihkhmat ka Rilum Khasi bad Jaiñtia kim kren eiei halor kane ka bynta da kaba kyrpad ruh ba ki dei ban kren eiei halor kane ha shwa ba ka umsaw kan tap lup bad ban duh noh shisyndon ïa ka Block-1 bad Block-2 sha ka Jylla Assam.
U la ong ba ka Regional Committee ba la thung da ka Sorkar Jylla ka khlem leit jurip ïa ki jaka kiba hap hapoh ka Block-1 hynrei mynta ka la dei ka por ba kan aiti noh ïa ka kaiphod sha ka Sorkar Jylla ban ïakren haba ïadei bad kane ka jingpynbeit pud ha ka wat ba-ar.
“Ngi kyrpad ïa u Myntri Rangbah ka Jylla ba un pyllait ïa ka por ban ïakren bad ka Forum khnang ba ka Forum kan ïoh ban ai ïa ki jingshisha baroh ha shwa ba kan poi sha kano-kano ka bynta ban shim ïa ki rai ha ka wat ba-ar khamtam eh ha kaba ïadei bad ka Block-1 bad Block-II”, ong u Bah Thomas.
Shuh-shuh, u la ong ba ka Sorkar ka dei ruh ban shimkhia ruh namarba ka la mih sa kawei ka jaka pynbeit pud bad ka Assam kata ka Byrnihat, namar lada ka Sorkar kam shimkhia, ka Nongpoh ruh la thikna ba kan sa hap lang ha ki jaka ïakajia pud hadien ka jingmih ka jingkren u Myntri Rangbah ka Assam ha kaba u la ong ba ka Byrnihat ka hap ha ka jaka ïakajia pud hynrei la ïohi ba haduh mynta kam don satia kano-kano ka jingkren na ka liang u Myntri Rangbah ka Jylla ne ki Symbud Myntri Rangbah ban pynshai halor kane ka jingkren u Myntri Rangbah ka Assam.
