Shillong, Ïaïong 03
Uwei u briew u la mynsaw na ka jingdei kuli hadien ka jingïoh khem bakla jong uwei u CRPF ïa ka suloi AK katba u dang pyrshang ban pynïeng ïa ka kali kaba pyrshang ban tynrah ïa ka kynhun ïaid pahara ha Mendipathar, North Garo Hills, ha ka miet sngi Balang.
Katba ka kynhun ïaid pahara ka thanat Mendipathar bad CRPF ki dang ïaid pahara hajan ka Pushpa Cloth Store, ha ïew Mendipathar, kynsan-kynsan la wan kawei ka kali kaba don ïa u registration number AS01-AM-7750 kaba la ñiah khlem akor bad pynher sted bha bad pyrshang ruh ban tynrah ïa ki CRPF kiba dang shong ha shuki ka Pushka Cloth Store.
Haba ïohi ïa ka jingma, ki CRPF ki la mareh na katei ka jaka ban ïada ïa la ka jingim bad ki la leit tur sha ka kali hynrei u nongñiah uba la don hapdeng ka jingshoh khawiang u la pynïaid biang shakhmat ïa ka kali haba pyrshang ban tynrah bad phet krad syndon ïalade, ong ki pulit.
Ha kane ka jingjia, haba ïohi ïa ka jingma bad ka jingthmu thombor ki runar, kane ka kynhun pahara ka la pyrshang ban pynsangeh ïa ka kali bad ha ka jingïada ïalade, uwei u CRPF u la pynap da ka AK bad pyrshang ban plie ïa ka jingkhang kali hynrei katba u dang plie ïa ka jingkhang, u nongñiah u la pyrshang phet biang kaba ha ka jingïaid kynsan ka kali, une u CRPF u la kum siat bad dei ïa uwei pat uba shong hapoh ka kali ïa uba la tip kyrteng u Neobirth R Marak (28) na ka shnong Thapa Darenchi.
Une u kuli u la leit dei na ki bynta jong ka lbong jong une u briew bad la pynkit noh mar mar ïa u sha ka jaka ai jingsumar ha Mendipathar PHC ban pynïoh ka jingsumar.
Ki pulit ki la kem noh ïa u nongñiah ka kali ba kyrteng u Sengrim K Sangma na ka shnong Thapa Darenchi.
Katkum ka kaiphod ki doktor, la pynthikna ba kine baroh ar ngut ki la shoh khawiang bha. Ha ka jingtalasi ïa ka kali, ki pulit ki la ïoh kurup bun bah ki bitor kyiad.
