Shillong, Ïaïong 03
Ki nongïalam ka Dorbar Shnong Wapungskur ha ka sngi Palei ki la leit ban ïakynduh ïa u Member Secretary ka Meghalaya State Pollution Control Board (MSPCB) ha Shillong, ban ujor pyrshah ïa ka jingthmu buh karkhana saiñ dewïong (Coke) hapoh u pud u sam jong ka shnong, ha ka jaka ba la tip da ka Thlukure Wah Tongtiang.
Na ka liang kine ki nongïalam shnong ki la pynpaw ka jingpyrshah ruh ïa ka jingai jingbit CTE (Consent To Establish) da ka MSPCB, bad pynpaw ruh ba ha ka CTE ba la ai da ka MSPCB la thoh ba kane ka jaka ka hap hapoh ka shnong Mookhep, East Jaiñtia Hills kaba long kaba bakla namar ka jaka ba thmu buh ïa ka karkhana ka dei hapoh u pud u sam jong ka Wapungskur.
U Waheh chnong ka Wapungskur, Postling Dkhar u la pyntip ba ka jingai jong ka MSPCB ïa ka CTE ka dei hadien ba la ïoh ïa ka jingmynjur na ka tnat Khlaw lyngba u DFO ba la pynpaw ba ha katei ka jaka ym don khlaw satia, katba ha katei ka jaka ka don ka khlaw shnong.
U la pyntip ruh ba ha ka sngi Balang u la ïakren bad u Dolloi ka Elaka Jowai lyngba ka phone uba la ong ïa kajuh, ba u la ai ïa ka jingbit (NOC) na ka daw bym don khlaw ha katei ka jaka.
U Waheh Chnong u la ong ba u la ai por 3 sngi ïa u Dolloi ban pyndam noh ïa ka NOC, bad ïathuh ruh ba u la kyntu ïa ka MSPCB ban leit hiar jurip sha ka jaka ban pynthikna ba kam dei ka jaka khlaw.
U la ong ba ka daw ba ka Dorkar Shnong ka pyrshah ïa ka karkhana ka long namar ka tdem kaba mih kam dei kaba kut tang ha shi jaka hynrei kan sma kylleng-kylleng.
U Bah Dkhar u la ong ruh ba naduh mynshwa ka Wapungskur kam ju shah ban buh ïa kum kine ki karkhana, hynrei kane ka karkhana kaba thmu ban wanrah mynta, tang ïa ka jingpynsngew paidbah ruh ka khlem don shwa ban sdang shna ïa ka.
“Na ka liang ka Dorbar Shnong ka la dawa na ka MSPCB ba ka dei ban pyndam noh ïa kane ka CTE kaba ki la dep ai”, u la ong.
