Jowai, Ïaïong 03
Ka Khasi Students’ Union (KSU) West Jaiñtia Hills District ha ka 3 tarik Ïaïong ka la dawa na ka tnat ka koit ka khiah ban beh mardor ïa u doktor kynshleiñ kynthei ha kawei na ki jaka sumar paidbah.
Ka KSU ka la ong ba ka la ïoh shibun ki jingujor ha kaba ïadei bad uwei u doktor uba la shah kynnoh ba u kynshleiñ kynthei. Ka KSU ka la kynnoh ba une u doktor u la leh shibun ki kam kaba kum ki ‘riew kynthei bad ka imlang ka sahlang kam lah ban pdiang.
Ka jingdon une u doktor ha katei ka jaka sumar ka pynsyier mynsiem ïa kiba bun ki nongpang bad kim sngew shngaiñ wat tang ban leit phah sumar ne wad jingsumar na katei ka PHC, la ong ka KSU bad bynrap ba ka ïai ap ba ka tnat ka koit ka khiah kan leh eiei pyrshah ïa une u doktor, pynban wat hadien bun bun bnai kam don kano kano ka jingshimkhia na ka tnat ka koit ka khiah.
Ha kajuh ka por ka KSU ka la dawa ruh ban pynshna ïa ka surok ban rung sha ka Namdong CHC kaba la sniew shaba palat.
Ka KSU ka la ong ba ka la dep ban ai jingthoh sha ka Myntri ka tnat koit ka khiah ka jylla, hynrei haduh mynta ym shym la shna ïa ka surok.
Na ka liang ka KSU ka la ai da ka jingthoh ha ka DMHO, West Jaiñtia Hills bad kyntu ban tuklar lem halor kine ki ar tylli mat ban myntoi ki paidbah khamtam ki longkmie kiba pun ba kha.
