Mairang, Ïaïong 03
Ka ïingbishar u M Kumar Special Judge (POCSO) West Khasi Hills, Nongstoiñ, ka la rai pynrem ïa u Dr. Ayam Sunil Khuman halor ka jingdonkti ha ka kam batbor ïa ka khynnah kynthei ba dang rit rta.
Katkum ka kyrwoh khubor ba la pyllait da ka shlem treikam u Superintendent of Police ka Eastern West Khasi Hills District, ha ka sngi Palei ka taïew, la pynpaw ba ha ka 27 tarik u Naitung, 2020, ka la don ka jingujor da ka ejahar pyrshah ïa u Dr. Ayam Sunil Khuman, 58 snem ka rta, uba dei na Khurai, Imphal East District bad uba buh jaka sumar bad die dawai ha Pyndengumïong, Mariang.
Ka kyrwoh ka ong ruh ba utei u doktor u la donkti ban thombor ïa kawei ka khynnah kaba dang rit rta bad hadien ba la register mukotduma, ïa ka jingtohkit la bynshet ha ka WPSI RR Marak ha thanat Mairang.
Shuh shuh la ong ruh ba hapdeng ka jingtohkit, ïa utei u briew la kem da ki pulit bad hadien ka jingbishar, ka ïingkashari ka la rai pynrem ïa u ban shong hapoh along 20 snem ryngkat ka kuna ba 1 lak 25 hajar tyngka katkum ki kyndon ka POCSO Act bad lada um lah ban siew ïa ka kuna, un hap ban shong patok shuh shuh sa hynriew bnai.
Sa kawei pat ka khubor ba la phah da ka shlem treikam u Superintendent of Police ka Eastern West Khasi Hills District, la kdew ba ha ka 4 tarik u Kyllalyngkot 2023, la don ka jingujor ejahar pyrshah ïa u Buksar Lyngdoh Lyngkhoi 37 snem ka rta, uba na ka shnong Dombahkseh ha EWKHD ba u la thombor ïa kawei ka khynnah kynthei hapoh 18 snem ka rta.
Katkum ka kyrwoh la ong ba une u briew u la donkti ban thombor ïa kawei ka khynnah kynthei ba dang hapoh 18 snem, hadien kata la register mukotduma bad ïa ka jingtohkit la aiti ha ka Kong B Nongrang WPSI ha thanat Mairang.
Shuh shuh la ong ba ha ka jingtohkit la kem noh ïa utei u briew bad hadien ka jingbishar ka ïingkashari jong u M Kumar, Special Judge (POCSO), West Khasi Hills, Nongstoiñ, ka la rai pynrem ïa u Buksar Lyngdoh Lyngkhoi ban shong hapoh patok 20 snem ryngkat ka kuna kaba 15,000 tyngka.
Nangta, sa kawei pat ka khubor la ong ba ka ïingkashari jong u M Kumar, Special Judge (POCSO), West Khasi Hills, Nongstoiñ, ka la rai pynrem ïa u Bah Phrangsngi Ryntathiang halor ka jingdonkti ban leh beijot ïa kawei ka khynnah ba dang rit ka rta.
Shuh shuh ka kyrwoh khubor ka ong ruh ba ha ka jingbishar, ka ïingkashari ka la pynbna ïa ka jingpynshitom da kaba set patok 3 snem ryngkat ka kuna kaba T.10,000. La bthah ruh ba lada um lah ban siew ïa ka kuna, un hap ban shong patok shuh sa hynriew bnai.
Ka khubor ba la pynmih na u Superintendent of Police, Eastern West Khasi Hills District, ka ong ruh ba ha ka tarik 4 tarik Naitung 2023, ki pulit ki la ïohpdiang ïa ka ejahar pyrshah ïa u Bah Phrangsngi Ryntathiang, 27 snem ka rta, uba shong ba sah ha shnong Dongkingding, Eastern West Khasi Hills.
Shuh shuh la pynpaw ba la kynnoh ba u la donkti ha ka kam leh beijot ïa iwei i kynthei, bad halor kane, ki pulit ki la register ïa ka mukotduma ha thanat Mairang hapoh ka Section 506 Para I jong ka Indian Penal Code bad ka Section 5(n)/6 jong ka POCSO Act.
La ong ruh ba ka jingtohkit halor kane ka mukotduma la bynshet ha ka WPSI ka Kong A Thongni, bad hadien ba la pynlong ki jingtohkit, ki pulit ki la kem ïa u Bah Phrangsngi Ryntathiang bad la set ïa u ha Judicial Custody.
