Shillong, Ïaïong 03
Haduh saw ngut ki nong Bangladesh ki la ïoh rung tuh shapoh u pud u sam jong ka India bad la kynnoh ba kane ka dei lyngba ka jingpynbam pisa ïa ki briew ha khappud.
Ka Hynñiewtrep Integrated Territorial Organization (HITO) ha ka step jong ka 3 tarik mynta u bnai, ka la ïoh ban bat haduh 4 ngut ki nong Bangladesh hajan ka Civil Hospital, Shillong na kawei ka kali Maruti Suzuki Alto kaba don ïa u registration number ML04-D-8966.
Na ka liang ka seng, haba ka la kylli bniah ïa kitei ki nong Bangladesh halor kane ka jingïoh ban wan rung tuh shapoh ka Jylla, ki la ïathuh ba ki la ïoh wan rung na khappud ka Dawki da ka jingthmu ban leit sha Guwahati bad kitei 4 ngut kim don satia ïa kino-kino ki kot-ki sla ba donkam hynrei ki don tang kawei ka mobile phone kaba don ïa ka sim card na Bangladesh.
Ha ka jingkylli bniah ka seng, kitei ki nong Bangladesh ki la ïathuh ruh ba ha ka por ba ki la rung na Bangladesh sha Dawki, u la don uwei u briew uba kim shym la ïathuh satia la u dei u Khasi ne u bym dei u Khasi uba la ïarap ban pynrung tuh ïa ki shapoh ka Ri India da kaba shim pisa.
Na ka liang u President ka seng, Bah Donbok Dkhar u la kyntu ïa ka Sorkar Jylla bad ka Sorkar Pdeng ba ka dei ban ai noh mardor ïa ka Inner Line Permit (ILP) hapoh ka Jylla lym kumta ka jingjur ka jingwan rung kyrthep ki briew kiba nabar ka Jylla bad ka Ri kan buh jingma ïa ka Jylla bad ka jaidbynriew hi baroh kawei.
U la ong khlem jingartatien ki don ki briew kiba dei ki paradoh-parasnam kiba donkti ha kane ka kam namar ka jingkhwan myntoi ïalade bad kim salia ban die ïa la ka Ri na ka bynta ka pisa.
“Ngi ïa kum kita ki briew kiba donkti, ngin wad haduh ban da lap ïa ka tynrai ba kine ki briew ki ïoh ban wan rung shaduh shapoh ka Jylla jong ngi bad ngin peit pyrkhing bha ïa kum kine ki jait”, bynrap u Bah Donbok.
Halor kane, na ka liang ka seng ka la aiti noh ïa kine ki nong Bangladesh sha ki bor pulit.
