Shillong, Ïaïong 03
Ka United Hynñiewtrep Movement (UHM) Ri-Bhoi hapoh ka jingïalam u Working President Bah Sparly Syngkli, ha ka 3 tarik u Ïaïong, 2025 ka la ïoh bad bat ïa ar ngut ki briew kiba dih bad die drok na ka shnong 17 Mer kaba hap ha Byrnihat katba ki dang pynïeng ïa ka trok harud surok.
Ka seng ka la ong ba halor ka jingïoh jingtip ba don ki briew kiba la suba ba ki dei nongtuh bad haba hiar sha katei ka thaiñ, ki la lap ïa ki ar ngut ki briew. Haba pyrshang ban kylli jingkylli na kitei briew, ki ong ba ki khlem leh eiei, hynrei ynda la khynra ïa ka trok la lap ïa ki drok bad thyrnia injek hapoh kawei ka borti.
Ha kaba ïadei bad kane ka jingjia na ka liang ka seng ka la pyntip sha ki bor pulit ka thanat Byrnihat.
Ka seng ha kaba ïadei bad ka jingkynrei u drok ka la ong ba kan ïaleh katba lah ban pynduhjait ïa u drok ha ki thaiñ Bhoi bad Byrnihat.
