Nongpoh, Ïaïong 03
Ka All Meghalaya Karbi Association (AMKA) ha ka sngi Palei, ka la ïoh ban pynkut noh ïa ka jingrakhe ba lai sngi lynter ïa ka Jubili Ksiar kaba la pynlong ha Purduwa, Raid Hoppati jong ka Ri Bhoi District. Ha kane ka sngi pynhap pyrda ïa ka jingrakhe, la wan ban ïadon ryngkat da u Myntri Rangbah ka jylla, Conrad K Sangma, u MLA ka Nongpoh, Bah Mayralborn Syiem, u MLA ka Mawhati, Bah Charles Marngar, ka MDC ka Nongpoh, Kong Rona Khymdeit, u MDC na Umroi, Bah Isynei Hinge, u Deputy Chairman ka Karbi Autonomous District Council, Avjit Kro nalor kiwei kiwei de.
Ha kane ka sngi, la sakhi ruh ïa ka jingwan ïadon bynta jong ki hajar ngut ki paidbah Karbi na kylleng ka jylla bad ruh kiba na Assam ban sakhi bad leh kmen lang ïa ka jingdap 50 snem ka jingïaid lynti jong ka AMKA ban shakri ïa ki paidbah Karbi ka jylla. La pynphuh-pynphieng shuh ïa kane ka jingrakhe lyngba ki jingshad jingrwai tynrai, ka jingpyniriam tynrai nalor kiwei kiwei de ban pyni sha ka pyrthei halor ka jingriewspah jong ka riti dustur ka jaidbynriew Karbi.
Kum shi bynta jong ka jingrakhe, u Conrad K Sangma u la plie paidbah ruh ïa u maw sah jingkynmaw jong ka Jubili Ksiar ha kane ka sngi, ha ka jingïadon lang ki kynrem ki lyndan bad ki nongïalam ka AMKA.
Na ka liang ki nongïalam ka AMKA ki la ïoh ruh ban aiti ïa ka dorkhas halor ki mat jingdawa kiba bun kiba ïadei bad ka jingdonkam jong ki paidbah Karbi sha u Conrad ba un peit bad shimkhia lem ban pynurlong ïa ki mat jingdawa.
Haba kren ha kane ka sngi, u Myntri Rangbah ka jylla u la ai ka jingïaroh ïa ki nongïalam ka AMKA naduh kiba mynshwa haduh kiba mynta, halor ka jingnoh synñiang ka jong ki lyngba ka seng ban kyntiew bad pynneh pynsah ïa ka riti ka dustur tynrai jong ki jaidbynriew Karbi ha ka jylla.
U Conrad u la ong ruh ba ngi don ïa ka histori kaba jrong bad ki paidbah Karbi ha ka jylla da kaba jer kyrteng ruh ïa ki rangbah kum u Chiko Timung, u Dominik Timung, Valerian Timung, u Joy Tado bad kiwei de kiba don ïa ka bynta kaba khraw ha ka jingïakhun ban ïoh ïa ka jylla ba pura, kat haduh ba ki hap ban shah set along da ki bnai bad pynpaw ba kane ka jinglenlade bad ka jingaiti ka jong ki, ka pynkynmaw ïa ka jingïadei kaba ïajan hapdeng ki paid Karbi bad ka jylla Meghalaya.
Ha kaba ïadei bad ka jingeh u pud u sam hapdeng ka jylla Meghalaya bad Assam, u Conrad u la ban jur ïa ka jingdonkam ban don ka shongsuk shongsaiñ bad ka jingïatreilang ryngkat ryngkat da kaba ai nuksa ba kane ka Sorkar kaba mynta, kala ïatreilang ryngkat ryngkat bad ka KAAC bad ki bor Sorkar ka jylla Assam ban shna ïa ki ïingskul na ka bynta ki khynnah kiba sah ha ki jaka kiba don jingkynad lane kita ki disputed area.
U la ong ruh ba da ki phew snem ki khynnah ha ki thaiñ khappud ki hap ban pule ha ki jaka kiba la shu thaw shipor na ka jingmih jingbym sngewthuh jingmut hapdeng ki bor pynïaid Sorkar, hynrei mynta lyngba ka jingïatreilang hapdeng ka Sorkar Jylla, ka Sorkar Assam bad ka KAAC, la ïoh ban sdang shna ïa ki ïingskul ban pynthikna ba ki khynnah kin ïoh ïa ka lawei kaba phyrnai.
Shuh shuh, u la ong ruh ba ka kam pynbeit ïa u pud u sam ka dei kaba don bun jyrwit jyrwat, hynrei wat la katta ruh na ka liang kane ka Sorkar kaba mynta ka long kaba la kut jingmut ban wad ïa ki lad ki lynti ban pynbeit ïa kine ki jingeh lyngba ka jingïakren bad ka jingsngewthuh jingmut.
Ha kane ka sngi, u Conrad u la ai jingïarap ruh kumba T.5 lak na ka Chief Minister’s Special Grant ban ïarap pisa ïa ka jingpynlong ïa kane ka Jubili Ksiar bad pynbna ruh ba ka Sorkar Jylla kan bei tyngka T.50 lak na ka bynta ban shna ïa ka Karbi Cultural Center kum shi bynta ban pynneh pynsah ïa ka riti ka dustur bad ka jinglong tynrai jong ki paid Karbi ka ban long ruh kum ka rynsan na ka bynta ki pateng ban wan ba kin tip ïa la ka tynrai lajong. Katba na ka liang jong u MLA, Bah Mayralborn Syiem u la aiti ïa ka Work Order kaba T.5 lak na ka bynta ban maramot ïa ka Auditorium jong ka AMKA.
Ha kaba ïadei pat bad ka jingdawa ban ïoh ïa ka jingithuh (Karbi nomenclature) ïa ka jaidbynriew Karbi, na ka liang u Conrad K Sangma u la pyntip ba kane ka kam ka dang don hapdeng ka jingpynbeit bad ïathuh na ka liang ka Sorkar Jylla ka la dep ban thaw ïa ka kynhun kaba la lamkhmat da u Commissioner & Secretary ka tnat Social Welfare ban pynbeit ïa kane ka mat bad ka Sorkar Pdeng.
Ha kane ka sngi, na ka liang ka AMKA ka la ïoh ruh ban pynkup burom kyrpang ïa u Myntri Rangbah barim ka jylla, u Dr DD Lapang, uba dei ruh uwei na ki nongaibuit ban seng ïa AMKA halor u synñiang uba la noh na ka bynta ka bha ka miat bad ban kyntiew ïa ka roi ka par ki paid Karbi, kaba la wan ban shimti da u Bah B Blah uba dei u khun, nalor ka jingpynkup burom kiwei kiwei de ki nongïalam jong ka AMKA.
