Shillong, Ïaïong 03
U MP ka Lok Sabha na ka Voice of the People Party (VPP) uba mihkhmat ïa ka Shillong Parliamentary Konstitwensi, Dr. Ricky Andrew J Syngkon, u la pyntip hapoh ka ïingdorbar Parliament jong ka ri India ba haduh mynta ki don ki kynhun ba la tip kum ki ‘High Level’ ki la pynkheiñ ïa ka jingkhang tih bad shalan ïa u dewïong da ka NGT hapoh ka jylla Meghalaya ha u snem 2014.
Kane ka jingpyntip u Dr. Ricky ka dei haba u shimbynta ha ka ‘zero hour’ kaba dang ïaid ka dorbar mang tyngka kaba la long ha ka sngi Palei.
U Dr Ricky u la ïathuh ba wat la ki ‘High Level’ ki la pynkheiñ ïa ka jingkhang tih dewïong da ka NGT hynrei wat ka Sorkar Jylla ruh kam shym la lah ban tehlakam ïa ka jingpyllait beaiñ ïa u dewïong.
Shuh shuh u la ïathuh ba katkum ka jingpynmih kawei ka kot khubor phareng ha Meghalaya ka la poi haduh 1.92 metric ton u dewïong uba la shah bat uba la tih beaiñ.
