Shillong, Ïaïong 03
Ka Sorkar Jylla ka la thaw ïa ka All Party Committee, ka komiti jong baroh ki seng saiñpyrthei na ka bynta ban ïakren bad ïasyllok halor ka jingtyrwa ban pynlong ïa ka Tura kum ka Nongbah Tlang lane ‘Winter Capital’.
Kane ka rai jong ka Sorkar ka la mih hadien ba ki sengbhalang bapher-bapher na Garo Hills ki la dawa ïa ka Nongbah Tlang ha Tura halor ka nongrim ban pynsuk ïa ka rukom treikam bad ki jingshakri ka Sorkar bad ban pynbiang tarajur ïa ka roi ka par ha baroh kawei ka Jylla.
Ha kane ka komiti yn kynthup ruh ïa ki dkhot na ki kynhun sengbhalang, seng saiñpyrthei bad kiwei kiba don bynta lang.
Lah ban pynpaw ba ki nongïalam seng saiñpyrthei ba kynthup ïa u Nongïalam Liang Pyrshah, Dr. Mukul Sangma bad ki kynhun bapher-bapher na Garo Hills, ki la kyrshan pura ban ithuh ïa ka Tura kum ka Nongbah Tlang.
Kane ka jingdawa Nongbah Tlang ha Tura ka la nang jur hadien ba kiba bun ki seng bad kynhun na Garo Hills ki la ai jingkyrshan.
Lah ruh ban pynpaw hangne ba ha ka dorbar Mang Tyngka kaba dang shu kut ha u Lber, u Dr. Mukul Sangma u la wanrah ruh ïa ka mat ïatai hapoh ka ïingdorbar, kaba la pynlong ïa u Myntri Rangbah, Conrad K Sangma ban kular ban thaw ïa ka komiti ka ban bishar bniah halor kane ka kam.
Kane komiti kan long hapoh ka jingïalam jong u Myntri Rangbah lane da u Myntri ba la thung da u Myntri Rangbah, ha kaba baroh ki seng saiñpyrthei kin phah 2 ngut ki dkhot ban mihkhmat ha ki jingïalang ba ka komiti kan pynlong bad ki tnat sorkar kiba don bynta bad kane ka kam kin shah khot sngewbha ban ai jingtip ha ki jingïalang ba ka komiti kan pynlong.
