Shillong, Ïaïong 03
Ka Sorkar Jylla ka la thaw ïa ka All Party Committee, kaba kynthup ïa ki seng kiba la ithuh bad kumjuh ki seng kiba la dep ban register, ban ïakren halor ka phang ban pynïasoh da ka lynti rel sha Meghalaya.
Ka jingpynbna ba la pynmih da u Chief Secretary, Bah DP Wah-lang ha ka sngi Balang, ka ong ba kane ka komiti kan dei kaba la khlieh da u Myntri Rangbah ka Jylla lane da kino-kino ki Myntri kiba u Myntri Rangbah u bynshet kam.
Ha kane ka jingpynbna ka Sorkar la bthah ba kawei-kawei ka seng saiñpyrthei kan phah 2 ngut ban long ki dkhot sha kane ka komiti, bad ki tnat Sorkar ba don jingïadei bad kane ka kam ruh kin shah khot sha ka jingïalang ban pynlong da ka komiti.
Ki kam jong ka komiti ki long ban shong bishar bad wad ïa ki lad ban pynbeit, ki lad ki lynti ban wanrah ïa ka jingshna lynti rel ha Meghalaya.
Ka komiti kan bishar ruh ïa ka jinglut-jingsep lada wanrah ïa ka lynti rel hapoh ka Jylla, kan sa pan jingmut na baroh ki kynhun bad hadien kan sa aiti ïa ki jingai jingmut sha ka Sorkar Jylla.
