Jowai, Ïaïong 04
Ka Dorbar Shnong Wapungskur, East Jaiñtia Hills District ka la ai por 3 sngi ïa u Dolloi ka Elaka Jowai, kumjuh u Chief Officer ka JHADC bad ka tnad Divisional Forest Officer, West Jaiñtia Hills District ban weng noh mardor ïa ka jingai ‘No Objection Certificate’ (NOC) bad ‘Clearance Certificate’ ba la ai na ka bynta ban seng ïa ka karkhana saiñ dewïong ‘Coke’ ha ka jaka khlaw kaba tip kum ka Thlukuru.
Ka Dorbar Shnong Wapungskur ha ka jingthoh ka la ong, “Ngi pynpaw ïa ka jingpyrshah kaba jur ïa ka jingleh jong phi ban ai ïa ka ‘No Objection Certificate’ bad ‘Forest Clearance’ sha ka Om Om Coke na ka bynta ban seng ïa ka karkhana kaba tip kum ka ‘Lam Coke Manufacturing Unit’ ha ka Thlukuru, Mookhep East Jaiñtia Hills District kumba la paw ha ka License no: MSPCB/ONLINE/CTE(R-1)/EJHD/2021/2024-25/56 dated Shillong 7th March 2025, ha kaba katei ka jaka ba la kdew haneng ka hap hapoh ka jingpeit jong ka shnong Wapungskur Hills ym ha ka shnong Mookhep.”
“Ngi dawa jur ban weng bad pynduh pyndam noh mardor ïa ka NOC/Forest ‘Clearance’ lane kino-kino ki kot ki sla kiba la pynmih ha kaba ïadei bad katei ka ‘Coke Plant’ hapoh 3 (lai) sngi naduh ka sngi ba la ïoh ïa kane ka jingpynbna bad ka sienjam kaba la leh halor kane ka dei ban pyntip sha ka Dorbar Shnong, lada ym lah ban leh ïa kane ka Dorbar Shnong kan shim da ki sienjam kiba tyngeh,” ka la ong.
Ha kaba ïadei bad kane, ka Dorbar Shnong Wapungskur ka la pynrem jur ïa ka jingai NOC bad ‘Forest Clearance’ khlem kano-kano ka jingpyntip shwa sha ka Dorbar Shnong Wapungskur bad khlem ka jingtip bad jingmynjur jong ka Dorbar Shnong bad ruh khlem da bishar bniah ïa ka jaka, ka shnong ha kaba katei ka thaiñ ka hap bad khlem da pynlong ïa kano-kano ka ‘Public Hearing’ bad ka jingktah kaba kan wanrah ïa ka shnong bad kumjuh ruh ïa ki shnong ba marjan hi baroh kawei.
